Purezidenti Yoweri Museveni ashabire abantu ba Africa okukwatanisiza hamwe...Photo by PPU

“Ninyikiriiriza omu nkwatanisa n’obumwe” – Purezidenti Museveni

N’ebya Omushaki Waitu

Purezidenti Yoweri Kaguta Museveni narabura abantu b’amahanga ga East Africa obutebaganisamu, agumize ngu nikicumbagiza entunguuka y’ekyanga eki.

Ebi Purezidenti abigambire nyomwabazyo aharwakataano, 12/1/2024 ahamukoro gw’okujaguza emyaka 60 y’okwetegyeka kw’eihanga erya Zanzibar ogubaire ahakishaayi ekya Amaan Sports Complex omuri Zanzibar.

Purezidenti Museveni arikugamba ahamukoro gw'okujaguza emyaka 60 ya Zanzibar okwetegyeka...Photo by PPU

Purezidenti Museveni ayetsirwe Mutahi we, Owek. Samia Suluhu Hassan, Mukuru w’eihanga erya Tanzania.

Zanzibar ekatunga okwetegyeka omugwa 1964 nikwo kwiha ahangoma Sultan wa Zanzibar na gavumenti ye y’abaharabu. Zanzibar ekegaita ahari Tanganyika 1964 kukora eihanga erya Tanzania.

Purezidenti Museveni arikugambaho na Purezidenti Samia Suluhu owa Tanzania..Photo by PPU

Kurugiirira ahari Purezidenti Museveni, ekaba eri encwamu nungi Zanzibar kwegaita ahari Tanganyika kukora Tanzania agumize ngu enkwatanisa nungi kikaba kiri ekyetengo ky’abarwanire obumwe bw’amahanga ga Africa nka Mzee Julius Mwalimu Nyerere.

Hoona Purezidenti ashabire amahanga ga Africa kukwatanisa baaba bari ab’okutunguuka n’okuganyirwa omukatare k’amahanga aga.

Zanzibar ejagwize emyaka 60 y'okwetegyeka. Omukoro ogu gukoreirwe ahari Amaan Sports Complex...Photo by PPU

Purezidenti wa Zanzibar, H.E Hussein Ali Mwinyi atabarukiize abantu ba Zanzibari ahabw’okuhika ahamyaka 60 y’okwetegyeka. Hoona agarukire yasiima Purezidenti Suluhu ahabw’okubashagika kureeba ngu emikoro egi yaabaho.

Bamwe ahabaahikire ahamukoro ogu omu Zanzibar...Photo by PPU

Bamwe ahabeebembezi abaahikire ahamukoro ogu harimu Purezidenti Paul Kagame owa Rwanda ogiizire ngu ah’eizooba eri, nibaijuka amamanzi agarwaniire okucungura eihanga eri.

#WestUpdates