Abebembezi aha ofiisi za NRM omuri Mbarara eriizooba 13.08.2025. PHOTO: AIDAN BATARINGAYA

Abeesimbire omuburuuru bw'aharurengo rw'egomborora na Tauni Kanso baashabwa okugira akaruuru k'obusingye baaba batarikwenda kuhenderera omubihome.

Okurabura oku kwaheebwayo ab'eby'okwerinda omuri Mbarara hamwe n'abebembezi b’ekibiina kya NRM abaaba beebembeirwe 'chairman' w’ekibiina  Prosper Tuhaise owatebeekanisaho orukiiko rw'aho n'aho orw'abesimbire ahantebe ya LC3 ahabw'amagomborora na tauni kanso zoona omudistrict ya Mbarara kureeba oku baakubaasa kugira akaruuru k'eihoreere.

Orukiiko oru rwaba aha ofiisi za NRM omuri Mbarara kandi rwayejumbwamu n'ab'eby'okwerinda bakuriirwe omuhwezi wa RDC Micheal Muhoozi na DPC SP Benon Byamukama, abarabura abo boona abarikwenda kureeta obutabanguko omukaruuru akaraateerwe nyenkyakare.

Emwe ahamyanya eyi ab'eby'okwerinda bagamba ngu ebaasa kuzamu obutabanguko ni Bwizibwera Rutoma tauni kanso ahi endigito y'amaani eri ahagati ya Grace Bagyenyi na Patrick Tumuhimbise.

Amagomborora agandi agubatireho amaisho garimu Bukiro na Bukiro Town Council.

#WestUpdates