Omuhwezi wa RDC w'Orurembo Hoima, Michael Kyakashari, ahanikire orumuri nk'akamanyiso k'okwijuka abaaitsirwe akakooko ka siriimu enshumi nkye ehweire omuri Hoima. PHOTO: Wilson Asiimwe

N’ebya Wilson Asiimwe
Abeebembezi omu disiturikiti ya Hoima beerarikiriire ahabw’okweyongyera omukujanjaara kw’akakooko ka siriimu omubantu.

Meeya w’orurembo rwa Hoima Bryan Kaboyo naagira ngu orurengo oru akakooko ka siriimu karikujanjaariraho nirwerarikiriza  kandi ngu hariho ekyetengo kugira ekyakorwa ahabarikukwatwaho boona kugyezaho kukyendeeza okujanjaara oku.

Kaboyo naagira ngu nk’abeebembezi, batwire nibakora ehururu omubyanga, ahakwetantara akakooko ka siriimu kwonka ebyanga ebimwe tibikaakiire kurungi obutumwa.

Ogu ebi abigambeire omurukiiko rw’okushwijuma oku okukuza ekiro ky’okwijuka abaaitsirwe siriimu nyomwebazyo Orwokubanza ebiro 20.05.2024 okwabeire kuri ahansi y’omutwe ogugyendereire kumaraho siriimu bwaza kuhika 2030.

Ekiro ky’okwijuka abaaitsirwe siriimu nikikora nk’omuranga ogurikwimusya abantu ku beegyendesereza akakooko ka siriimu.

Minisita w’enshonga za Bunyoro, Jeniffer Namuyangu, obu abeire nagambaho na bamwe omub’obushoboorozi omuri Hoima enshumi nkye ehweire, agizire ngu ahabw’emirimo ereetsirweho okutimba amajuta, abantu baingi beeshukire omururembo kandi ashabire abantu aba omubyanga obutatuurira eryo.

“Nk’abeebembezi, twerarikiriire ahakweyongyera kw’omubaro gw’abantu abaine akakooko ka siriimu omuri Hoima, ehururu eshemereire kwongyera ekateerwa kukyendeeza ahamubaro ogu,” nikwo agizire.

Ayongyeireho ngu obwa hati, ekitongore ky’eby’amagara kiriho nikikora n’ab’obushoboorozi batari bamwe na bamwe omu ihanga kureebeka ngu tibaagaruka kutunga abantu basya abakwatsirwe akaooko ka siriimu.

Minisita w’eby’obuheereza bwa boona, mary Mugasa ahigire eminyeto kwetantara okuteerana omuby’omubonano nk’omuringo gumwe gw’okukyendeeza okujanjaara kw’akakooko ka siriimu omu disiturikiti.

Minisita Grace Mary Mugasa arikugambaho n'abantu omuri Hoima ahamukoro gw'okwijuka abo abaaitsirwe akakooko ka siriimu enshumi nkye ehweire. PHOTO: Wilson Asiimwe

“Turiyo nituhiga abantu kutuura n’amagara agataine ndwara ahabw’okuba akakooko ka siriimu kariho kandi abo abu kaakwatsire bashemereire kumira emibazi ahabw’okuba Gavumenti efeireyo kuta emibazi omumarwariro,” nikwo agizire.

Disiturikiti ya Hoima niyo erikukizayo abantu abaine akakooko ka siriimu omuri Bunyoro n’ebicweka 6.7 ahari 100 omubaro ogurikukira ogw’eihanga ryona oguri ahabicweka 5.1
#WestUpdates