Abantu abarikuba baine endwara ya kooto niboreka obubonero bw’okuzimba ebicweka bitari bimwe by’omubiri, ebiroonda n’ebindi. Photo by Stephen Nuwagira.

N’ebya Stephen Nuwagira

KAZO

Abantu babiri bafiire omu disiturikiti eya Kazo ahabw’okugambwa kuba babaire baine endwara ya kooto (Anthrax).

Ab’obushoborozi omu by’amagara omuri Kazo nibateekateeka ngu abantu abo babaasa kuba bariire enyama y’ente erikugambwa kuba eitsirwe endwara ya kooto nikwo kushaba abantu okuza ahabuzoora maisho.

Abafiire bamanyirwe nka: Innocent Tibihika na Jonan Ariho kuruga omuri Keicumu omugomborora eya Engaari omu disiturikiti eya Kazo. Aba bafiire ebiro 10.12.2024.

Ab’obushoborozi nabwo bahaire eshagama ahamurwaire omwe ogiire ah’eirwariro erya Kazo Health Centre IV kukyebeza ahabiro 11.12.2024 bwanyima y’okworeka obubonero nk’obw’endwara ya kooto, okurugiirira ahari Dr Esther Bully Kiden, orikukora nka mukuru w’eby’amagara ahabwa Kazo.

Kiden naagira ngu omurwaire ogu oizire azimbire omukono n’ebicweka ebindi araguriirwe yataaha.

Abantu abarikuba baine endwara ya kooto niboreka obubonero bw’okuzimba ebicweka bitari bimwe by’omubiri, okucweka omubiri, ebiroonda n’ebindi.

Ab’obushoborozi bariyo nibasherura abandi bantu abakubaasa kuba bahikiine n’omurwaire ogwo hamwe n’abantu babiri abafiire.

Ku abuziibwe ahanshonga egi, Omugambirizi wa minisiture y’eby’amagara, Emmanuel Ainebyona agizire ngu tihaine eki bamanyire ahanshonga egi.

Omwaka oguhwaure, abantu 4 kuruga omugomborora eya Engaari n’omu tauni kanso ya Kazo bakairukangizibwa ah’eirwariro kutunga okuragurirwa bwanyima y’okukwatwa endwara ya kooto.

#WestUpdates