Abahababi nibagira ngu abarikujunaanwa ahabiro 14.12.2024 obwo bari omu kyaro kya Kirombe omuri Makindye bakaita Imam Muhammed. Photo by MARGRET ZALWANGO.

N’ebya Omushaki weitu

MAKINDYE

Kooti ya Makindye omuri Kampala esindiikire aharumanda abantu 4 abarikujunaanwa okwita omwegi wa S.3 barikumutura okwanga kwegaita aha kikoosi kyabo.

Abakwatsirwe barimu; Juma Mafabi Nakwere a.k.a Jonyido, 18; Faisal Abdul Muhammad, 20; Umar Mayinja a.k.a Alcheada, 29 na Lukwago Adinani a.k.a Richo Adi, boona abatuura ba Kirombe omuri Makindye Division. 

Aba nibagambwa kuba bari bamwe aha bikoosi by’eminyeto ebitwire nibinyangaraza abantu b’omuri Kibuli na Kansanga omuri Kampala.

Abahababi nibagira ngu abarikujunaanwa ahabiro 14.12.2024 obwo bari omu kyaro kya Kirombe omuri Makindye bakaita Imam Muhammed.

Nikigambwa ngu ekikoosi ky’abantu aba bakabiihabiiha Imam kubegaitaho beitu yayanga.

Nabwo nibagambwa kuba bamutiinisiriize emirundi mingi ngu nibeija kumuhababira omu bazaire beitu yaguma ayangire.

Ahabiro 14.12.2024, Imam 18, omwegi ah’eishomero erya Millennium High School in Kyankwanzi, akaba naaza kureeba nyina omuri Kampala kugura ebintu. 

Beitu, ku yabaire naatamburira omu bufudda bwa Kabalagala, Imam akagwa omu kikoosi ky’abantu abamuteire paver aha mutwe kandi akafa arikutwarwa ah’eirwariro rya Mulago.

Barikureebukaho omu maisho g’omuramuzi Patience Lorna Tukundane, abarikujunaanwa aba tibaikiriziibwe kugira ekibagamba ahabw’okuba omushango gwabo n’ogw’amaani kandi nigubaasa kuhurirwa omu kooti enkuru honka.

Omuhababi wa gavumenti, Victoria Ann Nantege amanyiise kooti ngu okucondooza omu mushango ogu kukiriyo nikigyenda omu maisho.

Aba basindiikirwe aharumanda kuhisya ebiro 18.02.2025.

#WestUpdates