Biishopu wa Bunyoro Kitara yeiguraho irwariro kuhitsya abantu obuheereza bwabusha...Photo by Thomas Tumwebaze

N’ebya Thomas Tumwebaze

Kibaale:

Nk’omuringo gumwe ogw’okuhitsya obuheereza burungi kandi obwa busha aha bantu omu disiturikiti ya Kibaale, Biishopu w’obureeberezi bwa Bunyoro Kitara, Rt. Rev. Samuel Kahuma yeiguraho kandi yaheereza omugisha eirwariro erya Buseesa Community HCIII.

Eirwariro eri nirihereza obuhereza bwabusha ahabantu abatari kwebaasa omu disiturikiti ya Kibaale.

Biishopu Samuel Kahuma arikurambura eirwariro eri...(Photo by Thomas Tumwebaze)

Biishopu Samuel Kahuma orikuza kuhumura omu kwezi kwa munaana, ariyo nayetoorora obureeberezi bwoona arikusiibura oteireho n’okwekambisa abakurisitaayo okuhamira aha nyikiriza yaabo.

Omu kwiguraho eirwariro hamwe na demonstration farm, Biishopu Kahuma ashabire abatuura okwejumbira omu program za gavumenti nka PDM hamwe n’ezindi kubaasa kweyiha omubworo.

Biishopu Samuel Kahuma arikurambura eirwariro eri...(Photo by Thomas Tumwebaze)

Biishopu Kahuma naagira ngu obwebembezi bwa NRM hamwe na Purezidenti Museveni bubaire burungi okubasiisa buri munya Uganda okukora entunguuka.

Martin Tumusiime, ori In-charge wa Buseesa Community HCIII naagira ngu nibazaarisa abakazi, bakyebera endwara ezitari zimwe hamwe n’obuheereza obundi kandi byoona biri ebyabusha.

Eirwariro erya Buseesa Community HCIII eryeigwirwe...Photo by Thomas Tumwebaze

Martin naagira ngu obuzibu obu baine n’okugira ngu tibaine entambura eya ambulance okutsindika abarikuba baremirwe okuzaarira ah’eirwariro eri.

Bo abatuura nibagira ngu eirwariro eri rikabahwera engyendo ndeingwa ezi babaire nibatambura okuhika Kibaale HCIV kandi ngu aha nibatunga obuheereza burungi obu barikuba nibenda.

Dr. Richard Lubega, ori Executive Director Buseesa Community Development Organisation, ekitongore ekiri kushagika eirwariro eri naagira ngu nibakora ebintu bingi aharimu obuheereza bw’eby’amagara obwabusha ahabantu oteireho n’okubashomesa emirimo y’entunguuka nikwo babaase kwetunguura omu maka gabo.

Dr. Richard Lubega n’omwe aha bahingi b’omutaano ab’omwaka 2023 aba Harvest Money Expo eya New Vision.

Eirwariro erya Buseesa Community HCIII nirishangwa omu kyaro kya Buseesa A, Buseesa Matale omu disiturikiti eya Kibaale.

#WestUpdates