Dureeva wa Aponye ateirwe aharumanda omu kihome Ntungamo.

N’ebya Isaac Nuwagaba

Obwo okucondooza omuri butandu efeereiremu omushuubuzi rurangaanwa, Apollo Nyegamehe, orikumanywa munonga nka Aponye aharwakana rwa wiiki ehwaire, kurikugyenda omu maisho, Pooriisi neegira ngu bakwatsire dureeva wa Aponye yaatwarwa omu kooti.

Moses Buyinza Isabirye naagambwa kuba akwatsirwe Orwakashatu, nikwo kutwarwa omu kooti ahi ateirweho omushango gw’okuvugisa ekimama akooherezibwa omu kihome kya gavumenti ekya Ntungamo kuhisya ebiro 01/08/2023.

Aponye aziikirwe omu maka gye ahi arikuzaarwa omu kyaro ekya Kitaburaza omu tauni kanso ya Muhanga omu disiturikiti ya Rukiga aharwakashatu.

Omuhwezi wa Purezidenti, Jessica Alupo niwe ajwekyeire Purezidenti Yoweri Museveni aha kuziika Aponye.

Omugambirizi wa Pooriisi ahabwa Rwizi, Samson Kasasira naagira ngu Buyinza aizire kukwatwa Pooriisi kugihweraho omu kucondooza kumanya ekyarugiriireho butandu egi.

Kasasira naagira ngu aba Pooriisi b’eby’ahanguuto, abacondooza omu Pooriisi n’abandi bahangu bagarukire baahika aha mwanya ogu butandu egi yabeire omu tauni kanso eya Itojo kwetegyereza gye.

#WestUpdates