Omuvugi wa baasi afeereire omuri butandu- Kyenjojo.

N’ebya Beth Akatukunda

KYENJOJO

Pooriisi omu kiro ekyabusheesha eriizooba yaahamya okufa kw’omuvugi wa baasi ya Link ofeeriireho bwanyima ya baasi ei abaire navuga kutomera emotoka empango ebaire eyemeriire.

Butandu egi ebaire ahari Mukunyu omu disiturikiti eya Kyenjojo aha ruguuto orwa Kampala-Fort Portal.

Omugambirizi wa Pooriisi ahabwa Rwenzori, Vincent Twesige, naagamba omuvugi ofiire nka; Daudi Kawawu kandi naagira ngu abandi abatungire obuhuta bairukangiziibwe ah’irwariro erya Kyenjojo kuragurirwa.

"Ahabiro 11/07/2023 shaaha nka 1:45 z’ekiro, butandu ebaire erimu emotoka ya baasi ya Link ehandiikirwe omu namba ya UAY 485E, etomiire ekimotoka kya trailor ekibaire kyemeriire kifiire ekya namba UAV 326W," Twesigye arikushoborora.

Egi ni butandu ya kashatu kubaho obwo emotoka zirikutomera ezindi ezirikuba zemeriire ahi abantu bafeereirwe amagara gaabo.

Aharwakaana rwa wiiki ehwaire, omushuubuzi rurangaanwa, Apollo Nyegamehe orikumanywa nka Aponye afiire bwanyima y’emotoka ye eya Toyota Landcruiser kutomera emotoka endiijo ebaire eyemeriire aha ruguuto orwa Mbarara- Ntungamo omuri Itojo.

Aharwamukaaga, owabaireho omuny’ishengyero wa Erute North, Charles Angiro Gutmoi, nawe afeereire omuri butandu bwanyima y’emotoka ei abaire navuga kwekunamurira ahari Ayago omu eirindiro ry’enyamaishwa erya Murchison Falls National Park obwo arikugyezaho kwetantara okutomera emotoka ebaire epakingire.

#WestUpdates