Inginiya wa disiturikiti ya Kyegegwa, Eng. Richard Baruku na konturakita owayombekire akatare k'ebitookye aka Katente, Hamuza Mutebi bakwatsirwe ahabw’okukombeka omu muringo gw'ekishobobo.

N’ebya Philip Murangira

KYEGEGWA

Omuhwezi wa karisho-risho wa gavumenti, Dr. Patricia Achan Akiria aragiire okukwatwa kwa Inginiya wa disiturikiti ya Kyegegwa, Eng. Richard Baruku hamwe na konturakita owatwaire empatane y'okwombeka akatare ka Katente Matooke Market, Hamuza Mutebi, ahabw’okukombeka binkwateire-ki.

Okukwatwa kw'aba kwizireho obu tiimu y’abakuru kuruga omu ofiisi ya Karisho-risho wa gavumenti eyebembeirwe Dr. Patricia Achan Okiria babaire nibarambura purogyekiti eziri ahansi ya DRDIP ezikozirwe omu disiturikiti ya Kyegegwa.
 
Okurugiirira aha muhwezi wa Karisho-risho wa gavumenti, akatare aka kakabariirirwa kw'ombekwa esente zirikwingana miriyooni 624 konka bakombeka akatare kakye munonga akatashemereire esente ezi. Kishangirwe ngu konturakita babaire baaherize kumushashuraho obucweka 85 ahari 100 bw'esente ezi.

Akatare k'ebitookye aka Katente omu disiturikiti ya Kyegegwa akarikugambwa kuba kombekirwe kubi. Photos by Philip Murangira.

Oihireho okwombeka akatare kakye, aka nako bakakombeka omu muringo gw’ekishobobo ahabw’okuba enjura ku erikugwa eteera omu katare omunda kandi katandikire n’okuzamu emishatuka.

Dr. Achan agumeizemu yarambura eirwariro erihango erya Kyegegwa ahi ashangire ngu abashaho nibaragiira  abarwaire kugura emibazi kandi ku agiire omu ibiikiro ry’emibazi yagishangamu.

Nabwo hoona, ashangire abashaho barikushaba abarwaire esente eziri ahagati ya shiringi 200, 000 na 250,000 baaba nibenda kubashemeza.

Na bwanyima Dr. Achan agiire kurambura enguuto ya Nabingola- Hapuuyo-Kakaba eyamazireho biriyooni 1 na miriyooni 8000 (Shs 1.8 bn) kandi okwo kakye emotoka ziremwe kurabayo ahabw’okugira ngu konturakita orikumanywa nka Pekasa akakora kubi enguuto egi kandi obwo yashashwirwe esente ze zoona zikahwayo reero akagyenda.

Emotoka y'omuhwezi wa Karisho-risho wa gavumenti yamara kugwa omu kiina aha ruguuto orwa Nabingola- Hapuuyo- Kakaba erikugambwa kuba ekozirwe kubi.

Omuhwezi wa kariisho-riisho wa gavumenti abugaineho abeebembezi ba disiturikiti ya Kyegegwa kandi agizire ngu aba baremirwe kukora ogwabo ogw’okureebuuza purogyekiti za gavumenti ekireeteire emirimo aha purogyekiti enyingi yaguma nekorwa kubi.

Ayorekire okukwatwaho ahabw'akakiiko akarikugaba emirimo okwihaho esente abantu abarikuba nibenda emirimo bahendera bagihaire abatagishemereire ahabw'enguzi. 

Eki kiizireho bwanyima y’okuheereza abaishiki babiri emirimo bataine bihandiko kandi ahi turikugambira aba bakairuka baaruga omu disiturikiti.

Abakozi ba disiturikiti ya Kyegegwa abaingi basiibire beesherekire ahabw’okutiina kukomwa.

#WestUpdates