Bashatu bacweriirwe kukomwa ameezi 36 ahabw’okwita ente za muriraanwa omuri Ibanda.

N’ebya Stephen Asiimwe

IBANDA

Kooti omuri Ibanda ecweriire abashaija bashatu okukomwa ameezi 36 omu kihome buri omwe ahabw’okwita ente 6 ezaamuriranwa.

Julius Mbonye, George Turyahabwe na Ronald Manirakiza kuruga omu gomborora eya Nyamarebe omuri Ibanda North Orwakabiri ebiro 24.06.2025 bacweriirwe kukomwa emyaka 3 bwanyima y’okusingisibwa omushango gw’okwita ente 6 zaamuriraanwa waabo, Eric Mfitumukiza.

Kooti ebaire ekuriirwe Omuramuzi Vastine Kembabazi ehuriire ngu abashatu aba bakakora omushango ogu ahabiro 17.06.2024.

Beitu hoona, Mfitumukiza tashemeriirwe n’encwamu ya kooti arikugira ngu abaire nayenda kooti abashatu aba buri omwe emucwere okukomwa emyaka 50 omu kihome.

Arikugambaho n’omunyamakuru weitu bwanyima y’encwamu y’omushango, Mfitumukiza agizire ngu abashatu aba okumwitira ente kikamugaruza omu bworo ngu ahabw’okuba nimwo yabaire nayiha entaasya y’eka. 

Nayongyeraho ngu ente ezi baitsire nizibarirwamu shiringi 12,000,000.

Mfitumukiza nabwo ashabire kooti kuragira banyamujunanwa okumukita na shiringi 20,000,000 kubaasa kugaruzaho ente ze hamwe n’esente ezi yakoriise omu kuhababa omushango ogu n’okugukuratiza kumara ameezi 12. 

Beitu hoona Omuramuzi amuhabwire okwiguraho omushango omu kooti ahaby’okumukiita.

#WestUpdates