Okuteera akaruuru k'okutoorana Ceeyamaani LC5 wa Hoima kuriyo nikugyenda omumaisho..(Photo by Annita Matsika)

Enjura yateganisa okuteera akaruuru – Hoima

N’ebya Annita Matsika

Okuteera akaruuru omu disiturikiti ya Hoima kuriyo nikugyenda omu maisho.

Eby’okuteera akaruuru k’okutoorana Ceeyamaani w’entebe yakataano ahabwa disiturikiti ya Hoima byateganisibwa enjura eyakyera negwa akasheeshe aka.

Oihireho eby’okuteeza akaruuru okuhika ahamyanya y’okuteereramu akaruuru ahari shaaha 11 z’akasheeshe, beitu hoona enjura yateganisa okuteera akaruuru omumagomborora agamwe nka Kyabigambira, Kakindo na Kitoba.

Okurugiirira ahakiragiro ekigarukirwemu eky’eby’oburuuru, okuteera akaruuru kushemereire kutandika shaaha 1 z’akasheeshe, beitu abateezi b’akaruuru baaba batariho, bokisi z’oburuuru tizikaigurwa.

Emyanya emwe yakyererwa okutandika kuteera akaruuru ahabw'enjura...(Photo by Annita Matsika)

Mukuru w’ekitongore eky’eby’oburuuru, Justice Simon Byabakama yaagira ngu tibakabaasa okuteeza akaruuru emyanya y’okuteereramu akaruuru yaaba etarikuhisya abateezi b’akaruuru 10.

Hillary Kabagambe, omuteezi w’akaruuru omugomborora eya Kyabigambire yaagira ngu yaahika ahamwanya gw’okuteereramu akaruuru ahari shaaha 1:30 z’akasheeshe beitu tiyabaasa kuteera akaruuru ahabw’enjura.

Hellen Mulumba, omutuura kuruga Kakindo yaagira ngu enjura yatandika kugwa nk’ahari shaaha 11 z’akasheeshe.

Abarikuteeza akaruuru bategyereize abateezi b'akaruuru...(Photo by Annita Matsika)

Okugarukamu akaruuru aka nikwijaho bwanyima y’owabaire ari Ceeyamaani wa disiturikiti egi Kadiri Kirungi kufeera omubutandu ahakutandika kw’omwaka ogu.

Abateezi b’akaruuru abarikurenga omu 94,825 behandiikise kuteera akaruuru aka omumyanya 173 omu disiturikiti ya Hoima.

Abetsimbire ahantebe egi harimu Uthman Mubarak Mugisa (NRM), Moses Aguda (NUP), Patrick Musiguzi (FDC), Savanna Vincent Muhumuza (Independent) na Lennox Mugume (Independent).

#WestUpdates