Onesmus Nuwamanya a.k.a Black okwateirwe okugambwa kuba aitsire omwana na nyina omuri Kakoba, Mbarara.

N’ebya Omushaki weitu

MBARARA

Omushaija orikugambwa kuba aitsire omwana na nyina omuri Alliance, Kakoba omu rurembo rwa Mbarara akwatsirwe Pooriisi.

Samson Kasasira, Omugambirizi wa Pooriisi ahabw’ekyanga ekya Rwizi naagira ngu Onesmus Nuwamanya orikumanywa munonga nka Black akwatsirwe Orwakabiri ebiro 15.07.2025 ahabw’okuteekateekwaho kuba aitsire Kyomugisha Scovia, 42 hamwe n’omuhara Amumpaire Gift,3.

Abagyenzi baitiirwe omu nju ei babaire nibapangisa omu kiro ky’ebiro 13.07.2025.

Nikigambwa ngu omugyenzi Kyomugisha atwire natuura n’abahara 3 abarimu; Nyamwiza Aminet,10 (ohonokireho), Amumpaire Gift, 3 (omugyenzi) hamwe na Evenitious Junior (ohonokireho) ow’omwaka gumwe n’ekicweka.

Aha biro 08.07.2025 shaaha nka 12:30 z’omwabazyo, Akampa Ambrose orikugambwa kuba ari ishe w’omwana omanyirwe nka Evenitious Junior akashangwa arikwenda kwita omwana ogu (Junior) nikwo omushango kubababwa aha Pooriisi. 

Akampa akaija yakwatwa yateebwaho omushango gw’okuteeraho kwita beitu kuruga eizooba eryo, banywani ba Akampa batwire nibatiinisiriza kwita Kyomugisha Scovia.

Aharwamukaaga ebiro 12.07.2025, Onesmus Nuwamanya (munywani wa Akampa) akataahirira Kyomugisha nikwo kwosya ebijwaro bye omu eihangwe omushana gurikujwa. 

Aha biro 14.07.2025, Nuwamanya ashangire Kyomugisha omu nju n’abahara 3 babyami nikwo kubatema, abantu babiri bakafeeraho.

Pooriisi eizire yahika aha mwanya nikwo kutwara emitumbi yaabo ah’eirwariro erihango erya Mbarara kwongyera kukyeberwa obwo okucondooza kurikugyenda omu maisho.

#WestUpdates