Abetabire omu mushomo ogu bahairwe ‘certificate’ kandi basiimire ekitongore ekya Enterprise Uganda ahabw’okubabangura. Photos by Ssengendo Abdulkarim.

N’ebya Abdulkarim Ssengendo

MBARARA

Abashuubuzi barikurenga omuri 20 omu rurembo rwa Mbarara baheendiire omushomo gwabo obumazire ebiro 6 ahari Acacia Hotel.

Omushomo ogu gutebeekanisiibwe ab’ekitongore ekya Enterprize Uganda kikwataniise n’ekigombe ky’abashuubuzi ekya Mbarara City Traders Association.

Abakuru kuruga omu kitongore ekya Enterprise Uganda, Commercial Officer wa Mbarara City Allan Buhanda n'abandi kuruga omu kigombe ekya Mbarara City Traders Association barikushara 'cake' bwanyima y'omushomo ogubaire aha Acacia Hotel.

Noah Wandera, Orikukurira eby’obushuubuzi omu kitongore ekya Enterprise Uganda naagira ngu ekigyendererwa ky’omushomo ogu n’okwenda kutunguura bizinesi z’abanya-Uganda.

Wandera ayongiireho emishomo y’ekika nk’eki nabwo ekozirwe omu bicweka ebindi omu eihanga ebirimu; Mitooma na Rwampara kandi naagira ngu okutendeka oku nikwija kwetoorora eihanga ryona.

Karakure Allan Buhanda, Orikukurira eby’obushuubuzi omu rurembo rwa Mbarara, obaire ari omugyenyi mukuru ashabire ngu ekitongore ekya Private Sector kibe nikyo kyayebembera ehururu y’okusharamu omuhanda ogu eby’entaasya y’eihanga byine kukoresa kubaasa kweyongyeraho.

Buhanda naagira ngu n’eky’okushwazana kushanga ngu ebiragiro by’okutunguura eby’entaasya y’eihanga nibisharwamu abanyabutegyeki kandi obwo abaingi betaine na bizinesi yoona ei barikukora.

Simon Seezi Mwijuka, Ceeyamaani w’ekigombe ekya Mbarara City Traders Association agizire ngu emishomo nk’egi nehwera abashuubuzi kumanya ebintu ebi baine kukora kutunguura bizinesi zaabo n’obujunaanizibwa bwabo ahari gavumenti.

Abetabire omu mushomo ogu bahairwe ‘certificate’ kandi basiimire ekitongore ekya Enterprise Uganda ahabw’okubabangura.

Omwe ahabetabire omu mushomo ogutebeekanisiibwe ekitongore ekya Enterprise Uganda omuri Mbarara arikutunga certificate.

#WestUpdates