PHOTO: Courtesy

N’ebya Simon Masaba

Aba Pooriisi 5 abarikuziha amaizi bacungurwa bwanyima y’eryato ryabo kugwa omu Nyanja ya Victoria omu kasheeshe k’eriizooba ebiro 06/08/2023.

Omuhwezi w’omugambirizi wa Pooriisi ya Kampala n’emyanya egiheriire, Luke Owoyesigyire, naagira ngu butandu y’eryato egi yabaho shaaha nka 4 z’akasheeshe kandi aba Pooriisi b’aha maizi baaba bari aha muhiigo gw’okuronda abantu abakibuzire abagwire omu Nyanja ya Victoria aha kutandika kwa wiiki egi.

“Ku twaba nitugaruka aha nkungu bwanyima y’okwiha omutumbi omu maizi, eryato ryeitu ryagwa omu Nyanja ahabw’omuyaga gw’amaani ogwaba guriho. Eky’omugisha omurungi, aba Pooriisi boona 5 abaaba bari aharyato eri babaasa kucungurwa bahuriire,” Owoyesigyire arikushoborora.
 
Naashaba abantu okuba abegyendesereza baaba nibatamburira aha maizi kwenda kwerinda z’abutandu nk’ezi kubaho. 

Owoyesigyire nayongyeraho ngu omuhiigo aha Nyanja ya Victoria ogw’okuronda emitumbi endiijo ekibuzire eyagwire omu Nyanja egi aha kutandika kwa wiiki egi guriyo nigugyenda omu maisho.

#WestUpdates