Dr. Jane Ruth Aceng (buryo) n'omwe ahabakungu bari ahakigaaniiro ky'eby'amagara ahari Sheraton Hotel omururembo Kampala, enshumi nkye ehwaire. PHOTO: Nancy Nanyonga

N’ebya Agnes Kyotalengerire

Ceyamaani w’akakiiko k’eby’amagara omu ishengyero, Dr. Charles Ayume, ashabire Gavumenti kushagika amarwariro agari aharurengo orwa 4 nari Health Centre IV barikutamu ebikoresa, emibazi n’abashaho. 

Okurugiirira ahari Dr. Ayume, eki nikiija kukyendeeza ahakyetengo ky’ebiiruka ebirikutwara abarwaire ahamarwariro amahango. Okucondooza nikworeka ngu eihanga riine amarwariro ag’eidaara rya 4 garikuhika 215 kandi ebi n’ebicweka 3.36 ahari 100 omu ihanga ryona. 

Abanya Uganda barikurenga omubicweka 90 ahari 100 nibatuura omuburaingwa bwa kiromita 5 haihi n’amarwariro g’eidaara rya 4 kandi abakazi abarikuhika ebicweka 70 ahari 100 nibazaarira ahamarwariro aga nangwa n’ag’ahansi nk’ageidaara rya 3. 

“Okuta sente z’okushagika obuheereza kushemereire kuza omuby’amagara eby’abantu aba buriijo ahabw’okuba niyo abantu abaingi barikuza,” Dr. Ayume nikwo agizire. 

Ayongyeire yaagira ngu okuta amajuta omumaato agarikutwara abantu ahamarwariro kuruga omubirwa by’omua Kalangala kuza ahamarwariro ag’ahaitaka omu rugyendo rumwe nikwetaagisa lita 200 z’amajuta ga diizolo kandi ezi nizigurwa shiringi 1,000,000. Eki nikimanyisa ngu buri murundi ogu ‘ambulance erikukoresibwa, neyetaagisa shirngi 1,000,000.

N’ahabw’ekyo, ahabw’enki tutarikugarukayo tukatereeza enkora, tukareebeka ngu amarwariro ag’omubirwa bya Namayingo, Kalangala na Buvuma,” nikwo agizire. 

Dr. Ayume abaire nagambira ahakigaaniiro ky’ebiriro 2, aha Hotel ya Sheraton omururembo Kampala, ahamiringo y’okubaisaho eby’amagara ahamwe n’ebishemereire kuhindurwa kureebeka ngu eby’amagara byakora kurungi omu ihanga. 

Okukoro oguhikirweho Minisita w’eny’amagara, Dr. Jane Ruth Aceng, ekigaaniiro eki kibeire kiriho n’abakungu kuruga omukitongore ky’eby’amagara eky’ensi yoona, eky’amahanga ageeteeraine (United Nations), ekitongore ky’eby’amagara, ba minisita hamwe n’abandi abu ekitongore kirikukwatanisa nabo kugaaniira ahakutaho enkora nsya z’okushagika eby’amagara n’obuhwezi bwa sente eziine akakwate n’ebigyendererwa by’ihanga.  

#WestUpdates 
#RadioWestAt25