Purezidenti Museveni arikuramusya abakuru omu gavumenti abahikire aha ruteerane omuri Kamuge, Pallisa aha Sande ebiro 10.11.2024. PPU Photos.

N’ebya Beth Akatukunda

BUKEDI

Purezidenti Yoweri Museveni ahamiize abantu b’omu kyanga ekya Bukedi ahabw’okwehayo kwa gavumenti omu kugumizamu neshagika puroguraamu ya Parish Development Model egyendereire kuhwera abanya-Uganda kuruga omukuhingira enda bakaza omu kuhingira esente.

Purezidenti Museveni ahaireyo okuraganisa oku aha Sande ebiro 10.11.2024 obu abaire nagambaho n’enkuyanja y’abantu abahikire aha ruteerane omu kishaayi kya Kamuge omu tauni kanso ya Kamuge omu disiturikiti eya Pallisa. 

Oruteerane oru ni rumwe aha kurambura kwa Purezidenti okw’okushwijuma kureeba oku puroguraamu ya PDM n’ey’okureetaho obutungi eya Operation Wealth Creation ziriyo nizikoramu omu kyanga ekya Bukedi. 

Purezidenti Museveni arikugambaho n'enkuyanja y'abantu abahikire aha kishaayi kya Kamuge omuri Pallisa aha Sande ebiro 10.11.2024.

Purezidenti nabwo ayongiire yashaba abantu ba Bukedi okwejumbira omu buhingi n’oburiisa obw’ekibaro ahabw’okwenda kutunguura ebyanga byabo.

Abantu ba Bukedi barikwakira Purezidenti Museveni aha kishaayi kya Kamuge omuri Pallisa.

Naagira ngu eki nikibaasa kuhikirira kurabira omunkora eya 4-acre Model ahi hiika emwe orikubaasa kugihingaho omwani, eya kabiri okagihingaho ebijuma, eya kashatu okahingaho ebinyatsi by’ente kandi hiika eya kana nobaasa kugihingaho ebihingwa ebyokurya. Purezidenti nabwo naagira ngu nobaasa kuriisa enkoko, empunu n’okuriisa eby’enyanja arikwongyeraho ngu ebi nibihwera amaka kwetunguura.

Purezidenti Museveni agarukire yarabura abarikukwatwaho omu mashomero ga gavumenti okwerinda okwiha fiizi aha baana b’abanya-Uganda abatarikwebaasa.

Purezidenti naagira ngu ahabw’enshonga ya fiizi ezi, pacenti ya 82 ahari 100 y’abaana omu kyanga ekya Bukedi nibaruga omu mashomero batakaherize P.7.

Museveni ayijukize abantu ba Bukedi ngu gavumenti ekozire ekirikubasika kyona yabateeraho puroguraamu nk’eya PDM, Operation Wealth Creation, Emyooga, NAADS n’ezindi ezigyenderiire kuhwera abanya-Uganda kuruga omu bworo, nikwo kushaba abeebembezi okuhabura abantu abu barikwebembera kukoresa omugisha gwa puroguraamu ezi kurwanisa obworo.

#WestUpdates