Gavumenti kushomesa abaana abateganisiibwe obushuma bw'ente omuri Lango

Purezidenti Museveni araganiise obwegyese bwa busha ahabaana abu amaka gaabo gaateganisiibwe obushuma bw’ente omukyanga ekya Lango.

Purezidenti Yoweri Kaguta Museveni yaagira ngu gavumenti neija kuhwera amaka agateganisiibwe obushuma bw’ente omubyanga ebya Lango na Acholi kandi aragiire Minisita w’eihanga ow’enshonga z’amatemba g’eihanga, Grace Feedom Kwiyucwiny kukwatanisa n’ab’obushoborozi na ofiisi y’enganzi y’eihanga kuhandiika amaka aga kutunga obuhwezi.

Purezidenti hoona yaagaruka yaahamya ngu abaana abarikushoma kuruga omu maka aganyangaraziibwe obushuma bw’ente kushomera busha omu mashomero ga gavumenti kuhisya obu embeera eragarukye omu buteeka.

Ebi purezidenti abigambire nyomwabazyo obu abaire naabuganaho abeebembezi kuruga omukyanga ekya Lango aha Baralegi State Lodge omugomborora ya Okwang omu disiturikiti ya Otuke, abamubuurize enteekateeka ya gavumenti ahabantu abataine butuuro omukyanga eki.

Ekyanga ekya Lango kirimu disiturikiti eza Alebtong, Amolatar, Apac, Dokolo, Lira, Kole, Oyam, Otuke, Lira City na Kwania.

Purezidenti agizire ngu nibaija n’okukaita amaka agu abantu baabo baafeereire omu kurwana kandi bahwere n’abaahutaire.

Purezidenti hoona ashabire enganzi y’eihanga kusindika obuhwezi ahabantu abataine ah’okutuura 

Ahanshonga y’abariisa abarikwiha embundu aheeru y’eihanga kuzikoresa kwiba amatungo g’abandi, Purezidenti ashabire abeebembezi kuhindura emiteekateekyere y’abantu aba.

#WestUpdates