Deputy RCC wa Mbarara City, Robert Kanusu, Hon. Minisita Ggoobi Fredrick, Jonas Tweyambe Chairmana Board UCA na Ivan Asiimwe baine abandi beebembezi aha Pelikan Hotel, Mbarara. PHOTO: ANDREW TUSHABE

Andrew Tushabe, Mbarara City.

Omujwekyerwa omukazi omu ishengyero ahabw’orurembo orwa Mbarara Hon. Ritah Atukwasa arabwire ba memba abari omubibiina by’abeeteeraine kwetantarira kimwe omuze gw’enguzi baaba nibenda kuteera orutambo rw’entunguuka omubibiina byabo.

Hon. Rita ebi abigambire obu abeire naabuganaho abeebembezi b’ebibiina by’abeeteeraine kuruga omuri Burengyerwa-izooba ahari Pelikan Hotel omururembo Mbarara omumushomo gw’ebiro 2 ogubeire gutebeekanisiibwe ekitongore ekirikugaita ebibiina by’abeeteeraine ekya Uganda Cooperative Alliance Limited kuruga Orwakashatu kuhisya Orwakana, wiiki egi.

Omunyeishengyero-kazi ogu niho ahigiire abeebembezi aba kuba abeesigwa omumirimo yaabo kandi bakeetantara emize y’okuryangatanisa sente z’abandi.

Hon. Minisita Fredrick Ggoobi Gume owa Cooperatives na Hon. Ritah Atukwasa omujwekyerwa omukazi ow'Orurembo Mbarara bari ahamukoro gw'abeeteeraine Orwakana ebiro 09.05.2024. PHOTO: ANDREW TUSHABE

“Nyowe ndi omushagiki enkomba ow’ebibiina by’abeeteeraine kwonka enshonga y’obwesigwa ehenzire emitima y’abantu oteiremu n’ebibiina by’abeeteeraine na za SACCO hatarimu kushwara n’akakye! Buri omwe arikutunga sente zitari ze nayenda aziryangatanise. N’ahabw’ekyo ogw’omuzimu gw’okwenda ebitari byaitu gureetsire ebizibu,” nikwo Hon. Rita agambeire abeeteeraine.

Hon. Ritah ayongyeire yaahabura abeebembezi aba agumize ngu baine kuba abanyamazima kandi n’emitima yaabo ekareeberwamu. “Ahabw’okuba abantu babeesigire, mwabahenda emitima, mbwenu hati nibamanya ng uku barikuhongayo sente zaabo, ahamuheru abamwe nimwija muburaho,” Ritah arikugambira ahakuhendera kw’omushomo ogu.

Kurugiirira ahari, Ritah, arikuhamya ebigambo by’omunyabwengye-kazi, Margaret C. “Peg” Snyder owaarwaniriire abakazi omuri Africa kwegaitira omubibiina kwetunguura omubya sente, abantu baine kwegaita, bakarundaana sente reeru bakabona kukora emirimo erikugyenda omumaisho n’okubareetera entunguuka.

Agarukire kandi hoona yaashaba abantu kureebeka ngu baatunguuka n’ebibiina byabo, batabizamu beitu byo bikabasiga enyima agumize ngu ekyo kigwire.

Omumushomo ogu, ogu Minisita Hon. Fredrick Ggoobi  Gume, ahikireho, Ritah ayongyeire yaashaba abatuura omuri Burengyerwa-izooba kuba akatare k’ebintu byabo na munonga omwani batakasheruriire aheeru, agumize ngu owaaza kubara omushenyi atandikira omubigyere bye.

Omushomo gubeire gugyendereire kuha abanyabibiina by’abeeteeraine amaani omumagyezi g’okwebembera n’okutambuza kurungi ebibiina ebi hamwe n’okwebuuza ahabeebembezi b'ebibiina by'abeeteeraine ahakutandikaho banka y’eihanga ey’ebibiina by’abeeteeraine ninga shi, National Cooperative Bank.

Daniel Rwebandira owa Rukiga SACCO nawe ayejumbire omumushomo gw'abebibiina by'abeeteeraine ahari Pelikan Hotel omururembo Mbarara ogubeireho wiiki egi. PHOTO: ANDREW TUSHABE

Minisita Ggoobi, ow’ebibiina by’abeeteeraine, omukugamba kwe ashabire abari omubibiina ebi kumanya abantu abarikuhwera kutunguura ebibiina ebi hamwe n’abarikukwatanisa nabo na munonga abo abarikubaha sente agumize ngu bashemereire kukimanya ku abajwekyerwa omu ishengyero ni banywani baabo omumuringo ogu.

Ayongyeire yaarabura abahingi b’omwani kurekyer’aho kuguza omwani gwabo abaguzi barikugugurira omumisiri. “Nibareeba obwire bw’okuhuumuruka ninga ebiro bikuru bwahika baija nibateera ekerengyere reeru babaha obusente bukye obw’aho n’aho. Obumwe nibaija na za minzaani zifiire. Omubwire bw’okupima kilo 50 bakupimira kiro 20 reeru bakwiba batyo,” nikwo Hon. Minisita agizire.

Kandi hoona ahabwire abeebembezi b’ebibiina ebi kuhika omuri ba memba baabo, bakareebeka ngu baabaha omwani kandi nabo babe abeesigwa babashashure sente zaabo.

Ahakutandikaho banka y’eihanga ey’abeeteeraine, Minisita ashabire abeebembezi b’ebibiina ebi kuranzya hare, bakareeba oku baakubaasa kuhwera ba memba baabo ahakutunga obuheereza bwa sente betaine kugumirwa agumize ngu ogu ni gumwe ahamiringo ei barikubaasa kuhayahayanamu na banka ezindi beitu eziine ekigyendererwa ky’okukora amagoba.

“Mutagira banka kandi hoona mukatandika kwiha amagoba ga za looni ag’ebicweka 23 ahari 100 omubwire omu baakubeire nibashaba amagoba gataremgire ahabicweka 10 ahari 100,” nikwo Minisita Ggoobi ahigire abeebembezi b’ebibiina by’abeeteeraine.

Bwanyima y’okushomesibwa ahankora ya banka y’abeeteeraine ey’eihanga, abeebembezi bacweiremu ku bashagika ekiteiso ky’okutandikaho banka yaabo omu ihanga.

Abedi Mujuni, Ceyamaani wa Ruhiira SACCO ayebembeire ba ceyamaani abandi ahakuhayo encwamu yaabo ahakutandikaho banka y'abebibiina by'abeeteeraine. PHOTO: ANDREW TUSHABE

“Itwe nka Cooperators twacweiremu ngu tukore banka eyaitu kubaasa kugira omukono omumishuuburo ey’eby’esente kandi nitwikiriza ngu twatandika banka eyaitu omu ihanga ryona, omuntu wa buriijo naija kuhwerwa kurahuka kutunga obuheereza bwa sente ataine kugumirwa kwona. Kandi twine n’ekigyendererwa ky’okuhwera ebikoosi ebikye nk’ab’emyoga na za PDM nabo kubaihayo bakatunguuka bakahika aharurengo rw’okukoresa sente nyingi omumirimo yaabo,” Abedi Mujuni, ceyamaani wa Ruhiira SACCO omuri Isingiro nikwo agizire.

#WestUpdates