Kabale University etongoize okushomeseza aha intaneeti na karimagyezi

N’ebya Job Namanya

Kabale University, Univasite yonka eya Gavumenti omukyanga ekya Kigezi n’emwe ahari Univasite 6 omuri Africa ezitungire obuhwezi kutunguura enshomesa ey’okurabira ahamikutu ya intaneeti Kanyabwengye (E-learning).

 Aba batongoize enkora eya  Centre of Competence in Digital Education (C-CoDE) n’obuhwezi kuruga omukitongore kya Ecole Polytechnique Federale De Lausanne (EPFL) omuri Switzerland n’eitendekyero erya Universite Mohammed VI Polythenique erya Morocco.

Kle University 2

Obuhwezi obubaririirwe esente ezirikwingana n’amafaranga ga Switzerland 40,000 (shiringi miriyooni 175 omuza Uganda), bukatungwa omundagaano eyakozirwe ebiro 18/5/2021. Aha matendekyero 44 agaabeire gashabire obuhwezi obu, 6 gonka omuri Africa nigo gabaasize kureeba okushaba kwago kurikwikirizibwa. Oyihireho Kabale University, agandi matendekyero agayikiriziibwe kutaho enkora egi ni Nelson Mandela African Institution of Science and Technology eya Arusha, Tanzania, Moi University eya Kenya, University of Abuja omuri Nigeria, Ecole Superiure Multinationale des Telecommunications eya Dakar, Senegal, na Universite Nangui Abrogoua eya Abidjan, Ivory Coast.

Bimwe aha biheirwe Univasite egi ahabw’enkora egi harimu studio y’omutindo eraakoresibwe abatendeki b’abeegi kukwata entambi ezi baraabe nibashomesezaho abeegi. Abatendekyi b’abeegi baheirwe n’okuhwerwaho kwetegyereza oku baraashomese kurungyi abaana.

Andres Gomez, omutendekyi w’abegyi kurabira omuri karimagyezi kandi enzaarwa ya Switzerland naagira ngu ekikozirwe Kabale nikiija kuhwera munonga abantu baingi.

Abebembezi ba Univasite egyi nibooreka ngu heine ekirahindukyemu ahaku baraabe nibahisya obwegyese aha beegi baabo.

Dr. Nicholas Kamara, MP wa Kabale naagira ngu kihikire kutunguura enshomesa kurabira aha mitimbagano omu Uganda ahabw’okuba ensi eriyo neekura.

Ekihandiiko ekyahwereire Kabale Univasite kutunga obuwezi obu kikakorwa ebiro 6/10/2020 kandi kyahandikwa Benon Basheka, Businge Phelix Mbabazi, Jones Murangira na Tumusiime Richard. Abeegi abarengire 6,000 nibo baraganyeirwemu omu kutendeka oku.

#WestUpdates