Kamwenge ekwataniise na gavumenti kugaruzaho ebisharara ebyacwekyereziibwe. Photos by Adolf Ayoreka.

N’ebya Adolf Ayoreka

KAMWENGE

Ahabw’okwenda kurwanisa ebizibu ebirikureetwa empinduka y’obwire omu eihanga, abatuura omu disiturikiti eya Kamwenge bakwataniise na gavumenti kugaruzaho hiika 120 z’ebisharara ebyacwekyereziibwe omuri za disiturikiti ahi omugyera gwa Mpanga gurikuraba.

Omugyera gwa Mpanga niguraba omuri za disiturikiti ezirimu; Kamwenge, Kitagwenda, Ibanda, Kabarole, Fort Portal City na Kyenjojo kandi nigwo gwonka ogurikukoresibwa nk’oburungo bw’amaizi omu kyanga eki.

Hiika zirikurenga 20 z’ebisharara ebyacwekyereziibwe omuri Kamwenge nizo zirikuza kugaruzibwaho.

Dr. Brian Guma Emmanuel, Orikwebembera akakiiko aka Lake Albert Water Management Zone ahansi ya minisiture y’eby’amaizi naagira ngi ekizibu eki baine ahamigyera gwa Mpanga n’okucwekyereza ebisharara ebigwetoriire ahi ebisharara ebimwe bihindukire faamu z’abantu, okutema emiti n’omushenyi kwijurirana omu mugyera ogu.

Ebisharara ebimwe bihindukire faamu z'abantu omu disiturikiti ya Kamwenge ahabw'abantu kuguma nibabitaahirira.

Arikutongozaho ehururu y’okugaruzaho ebisharara ebi omuri Kamwenge, Guma akyorekire ngu baatungire shiringi 5,000,000,000 (Sh5b) kuruga omu kitongore ekya Conlard N Hilton Foundation eky’omuri America kubaasa kugaruzaho ebisharara ebimwe ebyetoriire omugyera gwa Mpanga ebyacwekyereziibwe.

Kamwenge ekwataniise na gavumenti kugaruzaho ebisharara ebyacwekyereziibwe.

Hiika zirikurenga 20 z’ebisharara ebyacwekyereziibwe omuri Kamwenge nizo zirikuza kugaruzibwaho.

#WestUpdates