Kony najunaanwa emishango 36 omu kooti y’ensi yoona

Kony najunaanwa emishango 36 omu kooti y’ensi yoona

N’ebya Andrew Arinaitwe 

Kooti y’ensi yoona eya International Criminal Court (ICC) eteire emishango 36 ahari Joseph Kony, owakurire ekigombe ky’abahekyera ekya LRA.

Emishango egi erimu okutaahirira abantu ba buriijo, obwitsi, okuteeraho kwita, okutuntuuza, okuta abantu omubuhuku, okuhamba, okushiisha ebintu, okutorobooza, n’endiijo.

Emishango egi ehinguziibwe Ofiisi y’omutonganirizi wa Gavumenti, Karim Khan ahabiro 19/1/2024.

Khan naagira ngu Joseph Kony n’ekigombe kye ekya LRA bakataahirira abantu ba buriijo aharimu n’empungi n’ekigyendererwa ky’okuhamba Gavumenti.

Emishango egi neija kureetwa omumaisho g’abaramuzi Rosario Salvatore Aitala, Omuramuzi Tomoko Akane na Sergio Gerardo Godinez kubaasa kwikirizibwa.

Gavumenti ya Uganda etwaire nehiiga Kony owaburiize amaisho, kwonka nateekateekwa kuba ari omubibira bya Central African Republic.

#WestUpdates