Purezidenti Museveni arikugaaniira n'abeebembezi b'eby'obutegyeki yaheza kuhika aharuteerane orubaire aha kishaayi kya Maluku omuri Mbale Orwakana ebiro 19.12.2024. PHOTOS by PPU.

N’ebya Beth Akatukunda

MBALE

Purezidenti Yoweri Museveni aragiire ngu abantu boona abaatungire esente za puroguraamu y’entunguuka y’emiruka eya PDM omu buhenda biragiro bazigaruze ahonaaho.

Purezidenti akyorekire ngu omuntaayaayo ze ezi aizire nakore, ashangire ngu abantu abagaiga abamwe abarimu n’abakozi ba gavumenti bakatuunga esente za PDM kandi obwo batarikwikirizibwa kuzitwara nikwo kuragira ngu abaazitwire boona omubuhenda biragiro bazigaruze ahonaaho ngu ahabw’okuba bakatwara ebitari byabo.

Purezidenti Museveni arikuhuubira enkuyanja y'abantu yaheza kuhika aha kishaayi kya Maluku omuri Mbale kubagambira ahari Puroguraamu ya PDM.

Purezidenti Museveni agambire ebi nyomwebazyo obu abaire nagambaho n’enkuyanja y'abantu abahikire aha ruteerane orubaire aha kishaayi kya Maluku Sports Ground omu rurembo orwa Mbale. 

Omuhwezi wa Purezidenti Alupo arikuta omukono ahakihandiiko ky'abeebembezi ba Bugisu eky'okurangiirira Purezidenti Museveni kwesimbaho wenka omu karuuru ka 2026.

Oruteerane oru ni bimwe aha bi Purezidenti arikukora omuntaayaayo ze ez’okushwijuma n’okureeba oku puroguraamu ya PDM n’ezindi ezirikureetaho obutungi ziriyo niziteebwa omunkora omu kyanga ekya Bugisu.

Ba minisita Balam Barugahare (l), Lillian Aber na Dominic Mafabi abahikire aharuteerane rwa Purezidenti Museveni orw'okuhabura abantu b'omu kyanga ekya Bugisu aha puroguraamu ya PDM.

Purezidenti nabwo akyorekire ngu yaherize kuragira za Bank okurekyeraho kushara esente ahari shiringi 1,000,000 (Bank charges) arikwongyeraho ngu gavumenti niyo eine kushashura bank charges.

Purezidenti Museveni arikugaaniiraho naaba memba b'eminyeto erugire omu bigombe eby'orubaju oruhakani baaza omu kigombe kya NRM aharuteerane rwa Purezidenti aha kishaayi ekya Maluku omuri Mbale Orwakana ebiro 19.12.2024.

Museveni ayongiireho yahamiza abanya-Uganda ngu puroguraamu eya PDM neija kugumizamu nikwo kushaba abantu abarikuheebwa esente ahansi ya puroguraamu egi okureberera gye purogyekiti ezibarikutandikaho.

Abantu b'omu rurembo orwa Mbale namashemererwa maingi barikuhurikiriza Purezidenti Museveni aha ruteerane rw'ebya PDM orubaire aha kishaayi kya Maluku omuri Mbale.

#WestUpdates