Omuhwezi wa RDC wa Ntungamo, Rosemary Atuhaire, oragiire okukwatwa kwa Remegio Tumwine arikumujunaana okuryangatanisa shiringi 15,8233,000. Photo by Rwambuka Mugisha.

N’ebya Rwambuka Mugisha

NTUNGAMO

Orikukurira SACCO yaaba boda-boda omu disiturikiti ya Ntungamo ari omu kabi bwanyima y’okuryangatanisa esente z’ekigombe.

Mukuru w’ekigombe ekya Ruhaama Main Bodaboda Omwooga SACCO, akwatsirwe wiiki ehwaire bwanyima y’okugambwa kuba yaryangataniise shiringi miriyooni 15.8 za SACCO eyi arikwebembera.

Omuhwezi wa RDC wa Ntungamo, Rosemary Atuhaire, oragiire okukwatwa kwa Remegio Tumwine arikumujunaana okuryangatanisa shiringi 15,8233,000 ezabaire zigyenderiire kuheebwa ba memba ba guruupu egi nka puroguraamu ya gavumenti egyenderiire kurwanisa obworo n’okutunguura emiturire y’abantu.

Tumwine akwatsirwe Pooriisi bwanyima y’okwetomboita okuhairweyo bamwe omuri ba memba ba guruupu ei Tumwine arimu ngu tibakatungire sente zoona eza guruupu yaabo ya Emyooga kandi obwo bahikiriize byona ebirikwetenga.

Okurugiirira ahari Atuhaire, okucondooza nabwo nikworeka ngu mukuru wa SACCO egi nagambwa kuba yaryangataniise esente za Emyooga.

Tumwine aikiriize omu maisho ga Atuhaire ngu esente za SACCO akazikoresa nikwo kushaba ngu ayemererwe abaase kuronda esente ezi. Na bwanyima aizire yarekurwa bwanyima y’okwikiriza kugaruza esente ezi.

#WestUpdates