Owabaireho mukuru w’entebe ya kataano ahabwa disiturikiti eya Kole, Betty Akoli Nam ofiire.

N’ebya Hudson Apunyo

KOLE

Purezidenti Yoweri Museveni ayinamiire obaire ari mukuru w’entebe ya 5 ahabwa disiturikiti eya Kole, Betty Akoli Nam kandi amugambireho nk’obaire nakunda ekigombe kya NRM arikukirondera obushagiki.

Betty Akoli Nam, 60, afeeriire omu maka gye omuri Junior Quarters omu rurembo orwa Lira aharwamukaaga ebiro 14/10/2023 bwanyima y’okukwatwa oburwaire bwa aho n’aho.

Obutumwa bwa Purezidenti bumushomeirwe minisita w’eby’amagara, Dr. Jane Ruth Aceng aha kuziika Betty Nam omu tauni kanso eya Alito omu disiturikiti eya Kole aharwamukaaga ebiro 21/10/2023.

Purezidenti Museveni ahaireyo amaziika ga shiringi miriyooni 10 ow’omushaija w’omugyenzi, Dr Richard Nam kumuhweraho omu kuziika omukazi we.

Cecilia Atim Ogwal, kirinju omu ruganda rwa Okii Amat clan, orubaire ruri orw’omugyenzi, ashabire omushaija w’omugyenzi okuhama omu bwire obu obugumire. Ashabire abashweraine boona okuguma nibabeeraho abakundwa baabo omu mbeera zoona.

Biishopu Julius Ceaser Nina Otim, ow’obureeberezi bwa West Lango ashabire abahikire aha kuziika okuguma beeteekateekire ahabw’okuba tibarikumanya obu Ruhanga araabeete.

#WestUpdates