Mwegyende babasiraamure mwerinda HIV, abashaija bahabwirwe.

N’ebya Beth Akatukunda

Akakooko ka siriimu kariyo nikeyongyera omu minyeeto kuruga aha myaka 15-24, omu bashaija abataasiramwire, abantu ababaire bashwirweho hamwe n’abantu abarikweguza omu by’omubonano bete ba maraya nainga Sex Workers.

Abahangu kuruga omu kakiiko aka Uganda AIDS Commission nibagira ngu ekiretsireho okweyongyera kw’akakooko ka siriimu n’ahabw’abantu obutafayo kukuratira emiringo eyateirweho kurwanisa okujanjaara kw’akakooko aka.

Okurugiirira ahari Dr. Daniel Byamukama, orikukurira eby’okwerinda endwara y’akakooko ka siriimu, omubaro mwingi gw’abashaija tibarikufayo kukuratira omuranga gw’okusiraamurwa kandi abandi nibaanga nkana kukoresa obupiira bwa karinda magara (Condoms).

Dr. Byamukama nashaba abashaija boona omu eihanga okureeba ngu basiiraamurwa nk’oku okucondooza kuruga omu bahangu kurikworeka ngu omushaija osiraamwirwe emigisha ye y’okukwatwa akakooko ka siriimu ni nkye munonga.

Ebi bigambiirwe ahari Uganda Media Centre omu kutongozaho ekiro ekya International AIDS Candle Light Memorial Day ekirikwija kubaho ebiro 17/05/2024 omu rurembo orwa Hoima ahansi y’omutwe “Okumariraho kimwe endwara y’akakooko ka siriimu omwaka gwa 2030 gwaza kuhika, obwo abantu boona barikwejumbira omu miringo eyateirweho kugirwanisa.

Dr. Sarah Nakku kuruga omu kitongore ekya UNAIDS nashaba abantu abarikutuura n’akakooko ka siriimu okumira gye emibazi yaabo n’okwerinda okuturiza abandi bantu, eihanga ryaza kumariraho kimwe endwara y’akakooko ka siriimu, omwaka gwa 2030 gwaza kuhika.

#WestUpdates