Ekitongore ky'emibazi ekya NDA kyakwata omushaho w'ekiraguju, Dr. Rashid Lukwago

NDA yaakwata Dr. Lukwago ahabw’ekirango ky’okuhabisa abantu

N’ebya Charles Etukuri

Ekitongore eky’emibazi ekya National Drugs Authority (NDA), omwabazyo ogu kyakwata omushaho w’emibazi y’ekiiraguju, Dr. Ashiraf Rashid Lukwago.

Dr. Lukwago yakwatirwa ah’eirwariro rye haihi na pooriisi ya Kawempe bwanyima y’ekirango kye ekirikugamba ngu nabaasa kwozya eshagama y’omuntu kumwihamu oburwaire.

Dr. Rashid Lukwago omushaho w'ekiraguju..

Amakuru aga gaahamibwa Omugambirizi w’ekitongore ekya NDA, Abiaz Rwamizi.

Rwamizi yaagira ngu ekikoosi kyabo kyakwata Dr. Lukwago ahabw’ekirango kye ekirikubeiha ngu aine omubazi ogurikubaasa kwozya omuntu omushagama.

Ogu yashoboorora ngu batwaire nibakoragana na pooriisi barikumucondoozaho kubaasa kumukwata.

Ekirango kya Dr. Lukwago ekiine obutumwa bw'okuhabisa abantu

Omu kirango eki, Dr. Lukwago naagira ngu nabaasa kukoresa omubazi gwe ogw’ekiraguju kwozya eshagama y’omuntu kutamba endwara nk’akakooko ka Siriimu.

#WestUpdates