Purezidenti agizire ngu enshonga endaijo eine kukorwaho n’ey’amaizi g’abantu kukoresa omu maka gaabo n’okwitiriira ebihingwa. Photos by PPU.

N’ebya Beth Akatukunda

KOTIDO

Purezidenti Yoweri Kaguta Museveni naija kusaasira eminyeto ey’omu kyanga ekya Karamoja eyakwatsirwe ahabw’obushuma bw’amatungo n’okushangwa n’embundu omu buhenda biragiro.

Agambire ebi nyomwebazyo Orwakana ebiro 05.12.2024 obu abaire nagambaho n’abantu abahikire aharuteerane ahakishaayi kya Kotido omu Munisiparite ya Kotido obu abaire naheendera orutaayaayo rwe orw’okushwijuma oku puroguraamu ya PDM n’ey’okureetaho obutungi (Wealth creation) ziriyo niziteebwa omunkora.

Purezidenti Museveni yaheza kuhika aha kishaayi kya Kotido omu disiturikiti eya Kotido aharwakana ebiro 05.12.2024.

Enshonga y’okusaasira eminyeto ehairweyo Omuny’ishengyero wa Kotido Munisiparite, Peter Abrahams Lokii, oherize kugira ngu ba nyina b’abaana aba beeshukire omu maka gye barikumushaba kushaba gavumenti kusaasira abaana baabo.

Purezidenti Museveni aherize kugira ngu obushoboorozi oburikumuheebwa engyenderwaho y’eihanga akacweka aka 121 nibumwikiriza kusaasira abaana abarikuba bakwatsirwe batakahikize emyaka 18.

Purezidenti amazire ebiro 3 omu kyanga ekya Karamoja arikutaayaayira abahingi n’abariisa batari bamwe abaatungire esente za puroguraamu ya gavumenti eya PDM kandi abugaineho n’abeebembezi b’omuri Moroto.

Purezidenti Museveni nakyoreka ngu abantu b’omu kyanga ekya Karamoja beyongiireho arikugira ngu eki nikyetenga gavumenti okutamu amaani kutunguura emiturire yaabo.

Museveni nayongyeraho ngu abantu b’omu Uganda beyongiire kuruga ahabantu 14,000,000 omu mwaka gwa 1966 kuza ahabanya-Uganda 46,000,000 omu mwaka gwa 2024.

Purezidenti agizire ngu enshonga endaijo eine kukorwaho n’ey’amaizi g’abantu kukoresa omu maka gaabo n’okwitiriira ebihingwa.

Ahanshonga ya puroguraamu eya Parish Development Model, Purezidenti Museveni ashabire abantu b’omu kyanga ekya Karamoja okwejumbira omu puroguraamu egyendereire kubahwera kuruga omu bworo. 

Purezidenti Museveni agizire ngu esente zirikuhika Sh100m nizeija kuba nizoheerezibwa ahari buri muruka buri mwaka gw’eby’esente kubaasa kushagika abantu abaine entaasya nkye kwongyera ahantaasya y’amaka gaabo.

#WestUpdates