Ba Biishop aba nibaruga omu byanga nk’ekya Bunyoro, Ankole na Kigezi. PHOTOs by Caleb Bahikaho.

N’ebya Caleb Bahikaho

KIGEZI

Ba Biishop 23 n’abakazi baabo kuruga omu kyanga ekya Burengyerwa-Izooba bwa Uganda beerundaaniire aha kanisa ya St. Emmanuel Cathedral Kinyasano omuri Rukungiri ahabw’okweherera kwabo kw’ebiro 5.

Ba Biishop aba nibaruga omu byanga nk’ekya Bunyoro, Ankole na Kigezi.

Okweherera oku kukatandika Orwakashatu ebiro 13.11.2024 kandi ruheendiire aha Sande ebiro 17.11.2024 n’okushaba okuhikirweho enkuyanja y’abaikiriza aha kanisa egi.

Purezidenti Yoweri Museveni omu butumwa bwe obu araabiize omuri minisita w’eby’okwerinda, Maj. Gen. Jim Muhwezi asiimire ekanisa ahabw’okwebembera omuranga gw’entunguuka omu byanga byabo na munonga omu bikwatiriimu n’eby’obwegyese n’eby’amagara.

Asiimire ba Biishopu ahabw’okukora encwamu y’obwengye ey’okwegaitira hamwe omu kigombe bakabaasa kugaruzaho okwikiriza kwabo omuri Ruhanga, arikugira ngu we nk’omuntu tarikubaasa kusigara nk’oku ari yaheza kuruga omu ruteerane orwo.

Purezidenti Museveni ashabire ba Biishopu okwejumbira omu puroguraamu za gavumenti za gavumenti kubaasa kwongyera kutunguura emituriire y’abakuratsi baabo ahamwanya gw’okuguma aha kuburira ekigambo kya Ruhanga kyonka.

Asiimire Biishopu Onesmus Asiimwe owa North Kigezi Dayosiisi ahabw’obumwe obu aretsireho omu bantu ba Rukungiri omu bwire bukye obuyamara ari Biishopu.

Purezidenti agarukire yashaba ba Biishopu boona okutwaza nka Kinyasaano kureeba ngu buri kanisa yagira purogyekiti erikugitaahiza eyakubaasa kushendashenda abakuraasi baabo nabo kugira purogyekiti ezibayetandikiraho.

Okwehereera obu kwetabirwemu ba Biishopu boona ab’omu kyanga ekya Burengyerwa-Izooba bwa Uganda abakiri kukora n’abakazi baabo hamwe naabo abahumwire.

Purezidenti Museveni ahamirisiriize omugasho gw’abanyadiini kuhabura abakurasi baabo kureeba ngu bakorera okubagye kwongyerera aha byetengo by’omwoyo.

Museveni naagira ngu puroguraamu za gavumenti ni nkuru munonga omu kureetaho empinduka omu byanga kandi nashaba abanyasiini okukora omwoga muhango omu kushomesa abakurasi baabo kwejumbira omu puroguraamu ezi babaase kurwanisa obworo omu maka gaabo.

Purezidenti ahaire ekigombe ky’aba Biishopu shiringi 50,000,000 kubahweraho omu kutebeekanisa omukoro kandi Minisita Jim Muhwezi nawe ahaireyo omuganda gwa shiringi 10,000,000 aha mukoro ogu.

Minisita w'eby'okwerinda, Maj. Gen. Jim Muhwezi arikuheereza Biishop Onesmus Asiimwe owa North Kigezi Dayosiisi omuganda gwa Purezidenti Museveni ogwa shiringi 50,000,000.

Biishopu Asiimwe asiimire Purezidenti Museveni na Minisita Jim Muhwezi ahabw’omuganda ogu babahaire.

Biishopu George Turyasingura owa East Ruwenzori obaire ari omuburizi w’eizooba, ajumiriire omuze gw’okunywa amaarwa n’obushambani ebikanyire omu baikiriza.

#WestUpdates