Ebintu by’abaana byoona bicwekyereziibwe, kandi aba nibashaba abanyambabazi okubahwera. Photos by Aidan Bataringaya.

N’ebya Aidan Bataringaya

RWAMPARA- Oburaaro bw'aboojo ah’eishomero erya Rwenyaga SS omu gomborora ya Mwizi omu disiturikiti ya Rwampara bucwekyereziibwe omuriro omu mwebazyo gwa Sande. 

Ebintu by’abaana byoona bicwekyereziibwe, kandi aba nibashaba abanyambabazi okubahwera. 

Oburaaro bw’abeegi ahari Rwenyaga SS bucwekyereziibwe omuriro- Rwampara.

Edward Bikorwa- Mukuru w’eishomero eri naagira ngu omuriro gutandikire ahari shaaha 2 z'ekiro obu abeegi abaingi babaire bagiire kureeba omupiira gwa Arsenal na Aston Villa omu main hall y’eishomero, kandi abaire akiri omu ofiisi.

Ebintu ebirimu emifarasi, ebitabo, emyenda, ebitanda n’ebindi ebi abeegi barikukoresa omu kushoma byoona bihwireho, kandi abeegi 48 abarikuraara omu buraaro obu tihaine kibaine. 

Okurugiirira ahari mukuru w'eishomero, omuriro ogu niguteekateekwa kuba gutandikiire aha paasi, ei abaana basigire omu doomu batarikumanya ngu erimu omuriro.

Jotham Mwesigwa- Siipika wa disiturikiti ya Rwampara ayebembiire tiimu kuruga omu kitongore ekya Red Cross bahikire ah’eishomero eri kureeba ebintu ebisisikaire kandi naagira ngu nibeija kutaho oburyo kureeba ngu abaana batunga obuhwezi. 

Siipika wa Rwampara, Jotham Mwesigwa n'abakuru kuruga omu kitongore ekya Red Cross barikurambura oburaaro bw'abeegi obukwatsirwe omuriro ah'eishomero erya Rwenyaga SS omuri Mwizi, Rwampara omu kiro kya Sande ebiro 14/04/2024.

Mukuru w'eishomero nashaba abanya-mbabazi hamwe na gavumenti okubirukangirira ahabw’okuba tibaine hokutandikira.

Ebintu ebibariirwemu shiringi miriyooni 110 nibyo bisisikaire kandi oburaaro bw’abeegi obu babaire baheerize kuhunduuzibwa omu kihuumuro ekihwire, kandi bukamaraho shiringi miriyooni 14.

Samson Kasasira, Omugambirizi wa Pooriisi ahabw'ekyanga ekya Rwizi naagira ngu bariyo nibacondooza kumanya ekirugiriireho omuriro ogu.

#WestUpdates