Oburwaire bwa Bilharzia bubarukireho ahamyaro eya Kaberamaido.

N’ebya Annet Anaro 
 
KABERAMAIDO

Emyaro 6 omu disiturikiti eya Kaberamaido ehandikire abantu abakwatsirwe oburwaire bw’obunyantinda oburikukwata abantu obwa Bilharzia.

Okurugiirira aha kitongore ky’eby’amagara omu disiturikiti, emyaro etaahiriirwe oburwariro obu harimu ogwa Akampala, Apai, Bugoi, Okile, Murem na Kitoko Nacebwe. 
 
Bilharzia n’oburwaire oburikureetwa obunyantinda oburikutuura omu maizi.

Grace Tino Esolu, omushomesa w’eby’amagara omu disiturikiti egi naagira ngu abeegi abarikwingana obucweka 60 ahari 100 abari ahagati y’emyaka 14-18 ah’ishomero erya Okola Primary School bakwatsirwe oburwaire bwa Bilharzia kurabira omu kunywa amaizi gataboniire agu barikwiha omu Nyanja ya Kyoga.

Esolu naagira ngu aha bantu 100 abarikukyeberwa, abantu obucweka 29.2 ahari 100 nibo barikushangwa baine oburwaire obu omu kyaro ekya Obajai omu gomborora eya Okile.

Omu kyaro ekya Alua B omu gomborora eya Ochero, abaine oburwaire obu nibingaina obucweka 9.6 ahari 100 kandi omu kyaro ekya Agule omu gomborora eya Kobulubulu, okujanjaara kw’oburwaire obwa Bilharzia kwemeriire aha bucweka 52 ahari 100.

#WestUpdates