Minisita w’eihanga ow’eby’esente, Amos Lugolobi.

N’ebya Michael Odeng

Okuhurira omushango ahi minisita w’eihanga ow’eby’esente, Amos Lugoloobi arikujunaanwa okubuzabuza amabaati agabaire gari ag’okuheebwa abantu ba Karamoja nikugarukamu eriizooba ebiro 09/11/2023 aha kooti erikurwanisa obushomankuzi omuri Kampala.

Lugoloobi najunaanwa emishango 2 ey’okubuzabuza amabaati.

Omuramuzi wa kooti enkuru, Margret Tibulya niwe arikuhurira omushango ogu. Omutonganiirizi mukuru wa gavumenti, Jonathan Muwaganya niwe ajwekiire orubaju oruhababi kandi Puriida Tonny Tumukunde najwekyera kitabarizibwa (Lugoloobi) omu mushango ogu.

Omu mushango gw’okubanza, obuhababi nibugira ngu ahagati y’ebiro 14/07/2022 n’ebiro 28/02/2023 omu sitoowa za ofiisi y’enganzi y’eihanga omuri Namanve omu disiturikiti eya Mukono hamwe n’omu bicweka ebindi omuri Matugga omu disiturikiti eya Wakiso, Lugoloobi akatwara amabaati 400 agabaire gariho akamanyiso ka “Office of the Prime Minister”, arikukimanya ngu ekikorwa eki nikija kufeerereza gavumenti esente nyingi.

Omu mushango ogwa kabiri, nikigambwa ngu ahagati y’ebiro 01/02/2023 hamwe n’ebiro 16/03/2023 omu sitoowa za ofiisi y’enganzi y’eihanga omuri Namanve, Lugoloobi akagaruka yatwara amabaati 300 nago agabaire gariho akamanyiso ka “Office of the Prime Minister”.

Lugoloobi naagambwa kuba yatungire amabaati 600 omu bicweka 2. Naagambwa kuba yatungire ekicweka ky’okubanza ky’amabaati kuruga omu ofiisi y’enganzi y’eihanga aha biro 15/07/2022 ahansi ya voucher number 8058.  

Omuhwezi we omu by’obutegyeki, John Allan Damulira,akata omukono aha kihandiko ky’okutwara amabaati aga arikukoresa emotoka ehandiikirwe  omu namba ya UBG430S. 

Lugoloobi nabwo akatunga amabaati agandi 300 kuruga omu minisiture y’enshonga za Karamoja ahabiro 01/02/2023 ahansi ya voucher number 8527. 

Orupapura rw’amakuru orwa New Vision rukashohoza ebishushani by’amabaati gariho akamanyiso ka “Office of the Prime Minister-Uganda Kiboko pre-coated sheet PPG Gauge 28,” agu yabaire ashakiize ekiju ky’ente ze.

Ahabiro 28/02/2023, Logoloobi akacwamu kwihaho amabaati aha kiju ekyo. Beitu hoona, tiimu y’abakuru kuruga omu kitongore ekirikurwanisa obushomankuzi omu State House ekataahirira amaka ga Lugoloobi ah’eizooba niryo rimwe nikwo kukwata amabaati ago.

#WestUpdates