RDC wa Kagadi aigwireho eirwariro ry'okujanjaabiramu endwara ezigumire...Photo by Thomas Tumwebaze

N’ebya Thomas Tumwebaze

Kagadi:

Bwanyima y’abantu okuruga omu disiturikiti eziri omukyanga ekya Bunyoro ey’amashuma okuguma bateine obujanjaabi bw’omutindo obw’endwara ezigumire, RDC wa disiturikiti ya Kagadi ayigwireho eirwariro eririkuza kukyebera n’okujanjaaba endwara ezi.

Ekyoma eki nikiza kuba kiri ah’eirwariro erya St. Ambrose Health Centre IV omu tauni eya Kagadi.

Endwara nka shukari, omutima, ekiine, eshagama, puresha, hamwe n’ezindi nizimwe ahandwara ezirikukizayo kwita abantu ahabw’okuburwa obujanjaabi omubwiire.

Disiturikiti nka Kagadi, Kibaale, Kakumiro, Kikuube na Kyenjojo zibeire nizitunga obuheereza bw’okukyebera endwara ezi omumarwariro nka Mbarara, Fort Portal, Kampala hamwe n’ahandi.

Rdc Lillian Ruteraho Ari Nabakuru B'irwariro Eri Baheza Kwiguraho Eky'ombeko Eki

Bwanyima y’okwetegyereza obusasi obu abantu barikurabamu okutunga obuheereza obu, eirwariro erya St. Ambrose HCIV ryeiguraho ekyombeko ekirikuza kuba nikijanjaaba endwara ezigumire okwenda kuhisya obuheereza heihi n’abantu.

Bonikonsira Komugisha, omushaho mukuru ah’irwariro erya St. Ambrose HCIV naagira ngu abarwaire baingi babaire nibaremwa okuza omumarwariro g’amaani nka Kampala kandi obundi bahendera barikugaruka omukyaro kandi bafeerayo.

Henry Muhumuza, ori administrator w’eirwariro eri naagira ngu bakabanza kukora okucondooza aha buheereza obu abantu barikwetenga munonga kandi bashanga endwara nka shukaari na puresha zirikukizayo kuteganisa abantu.

Abagyenyi abahikire ahamukoro ogu

Muhumuza naagira ngu abarweire batwire nibaronda obujanjaabi obw’endwara ezi kandi baburondera hare.

Lillian Ruteraho, RDC wa disiturikiti ya Kagadi kandi okuriire omukoro gw'okwiguraho ekyombeko ekirikuza kubamu obuheereza obu naagira ngu district ya Kagadi eine Health Centre IV emwe kandi ngu obumwe abarweire okuruga ah’irwariro erya gavumenti nibasindikwa St. Ambrose HCIV okutunga obujanjaabi oburikukiraho.

Lillian ashabire okukwatanisa okutwire ahagati ya gavumenti n’amarwariro g’abantu nikwo abanya Uganda batungye obuheereza burungi.

Omukoro gw’okutongoza ekyombeko ekirikuza kuba kirimu obuhereza obwa Radiology Clinic gutandikire n’ekitambo kya misa ekibaire aha mbuga nkuru z’irwariro erya St. Ambrose HCIV.

St. Ambrose Health Centre IV niyo eine eishomero ry’abashaho erya St. Ambrose Institute of Health Sciences omu district ya Kagadi.

#WestUpdates