Beitu hoona omu kwezi kwa 8, 2024, Purezidenti Yoweri Museveni akahamisiririza eky’okwihaho okwiha emyenda y'ebikande omu mahanga g’aheeru. New Vision photo.

N’ebya Omushaki weitu

Abahangu nibagira ngu Uganda teketebeekaniise kukora aha bizibu ebirikwija kuruga omu kuzibira okujwara n’okuguza emyenda y’ebikande (used hand clothes) omu eihanga. 

Aba nibenda gavumenti ebanze eteho entebeekanisa y’okukora aha nshonga egi.

Omu mwaka gwa 2016, amahanga agarikwegaitira omu mukago gw’amahanga aga East African Community gakaikirizana kwihaho eky’okuguza n’okujwara emyenda y’ebikande, omwaka gwa 2019 gwaza kuhika kubaasa kutunguura amakorero agarikukora emyenda omu mahanga ago.

Entebeekanisa egi eyabaire eri ey’okuteebwa omunkora kurabira omukwongyera omushoro ahamyenda y’ebikande ekatunga okuhakanisibwa na munonga abo abarikugiguza kandi kuruga obwo, encwamu egi tekateebwaga munkora. 

Beitu hoona omu kwezi kwa 8, 2024, Purezidenti Yoweri Museveni akahamisiririza eky’okwihaho okwiha emyenda y'ebikande omu mahanga g’aheeru.

Omu kigaaniiro ekibaire ahari Kampala Serena Hotel Orwakabiri ebiro 03.12.2024, abarikukwatwaho bagizire ngu okuzibira okuguza n’okujwara emyenda y’ebikande kurimu ebizibu bingi barikugira ngu Uganda eshemereire kubanza yagira amakorero garikumara agarikukora emyenda.

Dayirekita w’eby’okucondooza omu kigombe ky’abanyamakorero ekya Uganda Manufacturers Association (UMA), Allan Ssenyondwa, nakyoreka ngu okuzibira okuguza emyenda y’ebikande otaabandize kutaho amakorero garikumara agarikukora emyenda eri ahamutindo nikiija kuteeganisa eby’entaasya y’eihanga.

#WestUpdates