Omufumu acweriirwe kukomwa amagara gye goona- Mbale.

N’ebya Omushaki Weitu

MBALE

Kooti enkuru omuri Mbale ecweriire omufumu okukomwa amagara gye goona ahabw’okusingisibwa emishango mingi erimu okwita, okuhooga abaana, okushagika ebikorwa by’okuhoonga abaana, okushangwa n’ebicweka by’emibiri y’abantu n’okutwara abaana omuringo gw’ekishobobo.

Omufumu ocweriirwe kukomwa amagara gye goona amanyirwe nka Ibrahim Isiko, kandi areebukireho omu maisho ga kooti enkuru ebaire ekurirwe omuramuzi Jacquelyn Okui nyomwebazyo.

Okumuheereza ekifubiro ky'amaani kigyenderiire kurwanisa ebikorwa by'okuhooga abaana omuri Mbale n'omu Uganda yoona okutwariza hamwe.

Ibrahim Isiko hamwe n’omurumuna Jamadah Isiko bakakwatirwa omuri Mbale omu kwezi kwa 9, 2022 ahabw’okugira akakwate n’okufa kw’omwana w’omwojo w’emyaka 5 owabuzire kuruga omu maka g’abazaire be omu kyaro ekya Cisse omuri Mbale Industrial City Divijoni.

Ebicweka by’omubiri gw’omwana ogu bikashangwa omu eishamba ry’ebikoijo haihi n’omugyera ogwa Namatala.

Jamadah Isiko owayebembiire Pooriisi kugitwara ah’ekikorwa ky’obwinazi eki kyabaire akaikirizana na kooti hamwe n’abakitabaaza baikirizana kitaka kandi ogu akasingisibwa omushango nikwo kukomwa emyaka 25 omu kihome.

#WestUpdates
#RadioWestAt25