Omukazi ogu najunaanwa emishango erimu ogw’obushuma, okweyeta eki atari hamwe n’okucupura ebihandiiko. PHOTO by Michael Odeng.

N’ebya Omushaki weitu

Omushuubuzi-kazi w’emyaka 33 orikujunaanwa okufeera Paasita w’omu rurembo shiringi miriyooni 700 asiindikirwe aha rumanda omu kihome kya Luzira.

Ritah Namalwa, omutuura wa Nsasa Bulindo, Kira Munisiparite omu disiturikiti eya Wakiso asiindikirwe aha rumanda aharw’okubanza ebiro 04.11.2024 Omuramuzi wa kooti ya Nakawa, Elias Kakooza.

Omukazi ogu najunaanwa emishango erimu ogw’obushuma, okweyeta eki atari hamwe n’okucupura ebihandiiko. Emishango egi yaheza kumusinga naaba naheebwa ekifubiro ekirikukirayo eky’okukomwa emyaka 14 omu kihome.

Kooti ehuriire ngu Daniel Jeddy Kabanda, iba w’omukazi orikujunaanwa obwa hati oriyo naahigwa Pooriisi ahungire omuri Botswana.

Abakundaine aba nibagambwa kuba bafeezire Biishopu Griva Musisi Kiwanuka, Paasita mukuru aha kanisa ya Prayer Palace Christian Centre omuri Kibuye, Kampala, shiringi miriyooni 700.

Eki kizireho bwanyima y’abakundaine aba kugambwa kuba betwire nk’abakozi b’omu kitongore ky’eby’empurizana ekya Uganda Communications Commission (UCC) nikwo kufeera Biishopu shiringi miriyooni 700 ezabaire zigyendereire kugura TV stations 2. 

Beitu hoona, abakundaine aba nibagambwa kuba bayakiire esente ezi nikwo kuburaho nazo.

Mariam Kulusum, omutonganirizi mukuru wa gavumenti ayangire ngu nyakujunaanwa ngu ahabw’okuba nawe nabaasa kutooroka ashangye omushaija we Botswana.

Eki kigyemesereize omuramuzi kwongyezayo omushango ogu kuhisya Orwakashatu ebiro 06.11.2024 kwikiriza omu Pooriisi owahiireyo amakuru kubuuzibwa.

#WestUpdates