Namawejje ashabire kooti okumusaasira ekamuheereza ekifubiro kiringaniire. Photo by Dismus Buregyeya.

N’ebya Dismus Buregyeya.

MASAKA

Omukazi owareebukire omu katambi ka vidiyo arikuneera omwana aha mutwe acweriirwe kukomwa emyaka 35 omu kihome. 

Kooti omuri Masaka esingiise Stella Namawejje, 34, omushango gw’okuriisa omwana obubi bwe oteireho n’okumunywisa enkari ye bwanyima y’okwikiiriza kuba yakozire omushango ogu.

Arikumuheereza ekifubiro aharwakashatu ebiro 07.11.2024, kooti ebaire ekuriirwe omuramuzi, Aloysius Tumwijukye agizire ngu kooti ereebiire aha ky’okugira ngu omukazi ogu nigwo murundi gwe gw’okubanza kukora omushango kandi ngu tasiisire n’obwire bwa kooti.

Omuhoreereza wa gavumenti, Brian Kalinaki abaire yashabire kooti kuheereza Namawejje ekifubiro ky’okukomwa amagara gye goona ngu ahabw’okuba ekikorwa eki yakozire tarikwetenga kuba ari omu bantu.

Namawejje, oine abaana 4 n’enzaarwa ya Kyazanga omu disiturikiti eya Lwengo kandi agambiire kooti ngu tarikumanya ekyamugyemesereize kukora ekikorwa eki eky’okuneera omwana akamuriisa n’obubi bwe. Namawejje ashabire kooti okumusaasira ekamuheereza ekifubiro kiringaniire.

“Twine abaana baingi abarikuraba omu mbeera nk’egi beitu abarikubakora ebikorwa ebi nibasigara batamanyirwe, Tutungire omugisha gw’okumanya Namawejje ahabw’okugira ngu akekwata akatambi ka vidiyo. Twine kurinda abaana beitu kureeba ngu tibatuntuzibwa,” Omuramuzi Tumwijukye arikushoborora.

Abahababi beebembiirwe Kalinaki bagambiire kooti ngu Namawejje ateire omwana ogu omu kabi k’okukwatwa endwara y’akakooko ka sirimu. Naagira ngu Namawejje ekyebiirwe ah’eirwariro erihango erya Masaka kandi ashangirwe aine endwara y’akakooko ka sirimu.

Kalinaki naagira ngu omwana ogu ariyo naragurirwa kandi bamuteire n’ahabuheereza obwa PREP kumutangira obutakwatwa endwara y’akakooko ka sirimu.

Namawejje nawe akyebirwe Dr. Hobert Kalema ah’eirwariro erya Masaka kandi ashangirwe ngu tataabukire mutwe.

Kooti ehuriire ngu ahagati y’ebiro 24.09.2024 hamwe n’ebiro 24.10.2024, nyina w’omwana ogu omanyirwe nka Oliver Mbabazi akeesiga Namawejje yamusigira omwana we kumumureeberera nikwo kuza kukora.

Abahababi bagambire kooti ngu obujurizi oburikwomesereza Namawejje bukiihwa omu katambi ka vidiyo aku yakwatiise esimu ye y’omungaro.

#WestUpdates