Omupooriisi atsindikirwe omukihome ahabw’okwiba emibazi ya Gavumenti...(Photo by Nagudi Fatimah)

N’ebya Nagudi Fatumah

Kyenjojo:

Kooti omu disiturikiti ya Kyenjojo etsindikire omu pooriisi omukihome kumarayo emyaka 4 bwanyima y’okusingisibwa omushango gw’okwiiba n’okuguza emibazi ya Gavumenti.

Kooti ebaire ekuriirwe omuramuzi, Aciba Gloria Nimungu etsindikire omu pooriisi AIP Kule Yusufu Katuramu omukihome kumara emyaaka 4 bwanyima y’okusingisibwa orubanja rw’okwiiba n’okuguza emibazi ya gavumenti. 

AIP Kule Yusuf Katuramu na puriida we Dushabe Samuel omu kooti...(Photo by Nagudi Fatimah)

AIP Kule Yusufu Katuramu, 59, obeire nakorera aha pooriisi ya Kyenjojo akakwatibwa Okwamwenda omwaka oguhwaire omukikwekweto kya National Drug Authority eky’okurwanisa obushuma bw’emibazi ya Gavumenti n’abandi bantu 6 kandi aba bakarahuka kwikiriza emishango yaabo nikwo kukomwa ahagati y’emyaka 3-6.

Kakuru Joel Akatukunda, ori omutongaanirizi wa Gavumenti omu kooti eya Kyenjojo agambiire kooti ngu emibazi ei bakwatsire eyibirwe ekaba nebarirwamu kuba nejanjaaba abantu abarikurenga omuri 6000 nikwo kugira ngu ogu akafereza abantu abo kutunga obujanjaabi bwabusha hamwe n’okugira ngu asisiire obwire bwa kooti nikwo kushaba ngu kooti emuheereze ekifubiro ky’emyaka 7.

AIP Kule Yusuf Katuramu omu kooti...(Photo by Nagudi Fatimah)

Kandi Dushabe Samuel owa Kesiime and co. advocates puriida wa Kule ashabire kooti kumufubira kukye ahabw’okuba ngu akuzire kandi aine obujunanizibwa bw’okureeberera abaana 6 hamwe n’okugira ngu arwaire n’ow’okushemeza.

Aba nibagambwa kuba bashangirwe n’emikyebe ya ARVs 10, Anti-malarial 80, test strips eza HIV 100 n’eza Hepatitis B, obudomola 12 oburikukoresebwa omu Labaratory n’ebindi ebi babaire nibatwara Congo.

AIP Kule Yusuf Katuramu naija kukomwa emyaka 4 omukihome...(Photo by Nagudi Fatimah)

Abiazi Rwamwiri, omugambirizi wa National Drug Authority (NDA) asiimire encwamu ya kooti arikugira ngu eki nikiza kuba eky’okureeberaho ahabantu abandi.

#WestUpdates