Omuriro gukwatsire ebyombeko by’abashuubuzi, ebintu byacwekyerera- Sheema. Photos by Bruno Mugizi.

N’ebya Bruno Mugizi. 

SHEEMA 

Abashuubuzi b’omu tauni ya Kabwohe omuri Sheema Munisiparite bari omu marira bwanyima y’omuriro kucwekyereza emishuuburo yaabo ebaarirwemu esente nyamwingi.

Okurugiirira aha bayerebera n’agabo, omuriro ogu gutandikire shaaha 7:30 z’ekiro ekyabusheesha eriizooba kuruga omu duuka ya Elioda Burakari nikwo kujanjaara gukakwata na Super Market, eduuka y’emyenda n’agandi maduuka 2.

Burakari ou eduuka ye ya Wholesale ehwireho anaagira ngu ebintu ebibaririrwemu shiringi 1,500,000,000 (1.5 billion shillings) bicwekyereire omu muriro ogu.  

Omushuubuzi ondaijo, Mucunguzi Jackson oine eduuka y’emyenda naagira ngu bimwe omu mishuuburo ye ebaarirwemu shiringi 15,000,000 bihiriire omu muriro ogu.

Martial Tumusiime, Omugambirizi wa Pooriisi ahabw’ekyanga ekya Bushenyi empango yaagira ngu Pooriisi ya Sheema eyebembiirwe Omuduumizi wa Pooriisi, Consilata Kasule emanyisiibwe aha muriro ogu. 

Pooriisi ya Sheema erikuhwerwaho ekitongore kya Pooriisi ya Bushenyi eky’okuraaza omuriro babaasize kuraaza omuriro gutakakwatsire ebyombeko ebindi.

Naagira ngu omuriro ogu gurugiirire ahai mashanyarazi.

#WestUpdates
#RadioWestAt25