Omuriro omu kanso ya Kabale; Siipika na Ceeyamaani baremirwe kwikirizana..(Photo by Job Namanya Apuuli)

N’ebya Job Namanya Apuuli

Kabale:

Habaireho katemba omu kanso ya disiturikiti ya Kabalebwanyima ya  Ceeyamaani wa disiturikiti, Nelson Nshangabasheija na Siipika, Flavia Nyinakiiza Kanagizi kuremwa kwikirizana ah’ab’akakiiko akarikugaba emirimo aha disiturikiti.

Siipika, Flavia Nyinakiiza Kanagizi...(Photo by Job Namanya Apuuli)

Nshangabasheija ashomiire kanso amaziina ashatu g’abantu b’okuta aha kakiiko aka kandi aba babeire barimu Bernard Tumukunde, Peace Ndyamuhaki na Jackline Njuyarwo. Ogu ashabire ngu aba beikyirizibwe ahabw’okuba abarimu obwahati n’ab’okumara kukora ebiro 10/2/2025.

Beitu we Kansara wa Kabale Municipality Central na Northern Division, Verah Tuyizere Tumuheki ashabire ngu amaziina gaba gasindikwe omukakiiko ka kanso kushwijumwa batakabasindikyire omu ‘Public Service’.

Siipika Nyinakiiza nawe nikwe kuhagyira ekiteiso ekyi ekyiteganiise Nshangabasheija. 

Omuriro omu kanso ya Kabale; Siipika na Ceeyamaani baremirwe kwikirizana..(Photo by Job Namanya Apuuli)

Nshangabasheija ku aremire kuhurira okuhaburwa kwa Siipiika, Nyinakiiza yatumisaho omuserukare wa kanso kuhwera Ceeyamaani kushutama.

Obuteikyirizana kubugumizemu, Siipiika yashaba ngu kanso ehumureho okumara eshaaha erengyire emwe beitu n’obu bagarukyire, Nshangabasheija agumizemu n’okwesharinga.

Ekyi kyiharirize Siipika kwemereza orukiiko oru kuhisya obwire obutakamanyirwe.

Kanso egyi ebeire eshutamire kushwijuma ebikozirwe omu mwaka ogu hamwe n’okuganiira aha nshonga z’okureeta orurembo orwa Kabale beitu enshonga eya ‘Service Commission’ eteganiise byoona.

#WestUpdates