Abandi abarikujunaanwa na Geraldine Ssali barimu Puriida Julius Kirya n’abany’ishengyero, Michael Mawanda Maranga (Igara East), Ignatius Wamakuyu Mudiimi (Elgon County) na Paul Akamba (Busiki County).

By Michael Odeng

Owabaire ari omuhandiiki w’entuura omu minisiture y’eby’obushuubuzi, Geraldine Busuulwa Ssali n’abandi abu arikujunaanwa nabo, aha mishango y’obushomankuzi eine akakwate n’okuryangatanisa shiringi 3,800,000,000 ez’ebigombe by’abeteraine nibateekateekwa kureebukaho omu kooti enkuru erikurwanisa obushomankuzi eriizooba ebiro 25.11.2024.

Aba nibateekateekwa kureebukaho omu maisho g’omuramuzi, Jane Okuo Kajuga owa kooti enkuru erikurwanisa obushomankuzi kubashomera emishango.

Ssali najunaanwa emishango eine akakwate n’okuryangatanisa Sh3.8b ezabaire ziri ez’ekigombe ekya Buyaka Growers Co-operative Society Ltd na Leonard Kavundira (Orikukurira ebigombe by’abeteraine omu minisiture y’eby’obushuubuzi.

Abandi abarikujunaanwa barimu Puriida Julius Kirya n’abany’ishengyero, Michael Mawanda Maranga (Igara East), Ignatius Wamakuyu Mudiimi (Elgon County) na Paul Akamba (Busiki County).

Ssali na Kavundira nibajunaanwa emishango y’okukoresa kubi ofiisi n’okufeereza gavumenti esente kandi abany’ishengyero nibajunaanwa okwakira ebintu by’enyibano n’okuryangatanisa esente za gavumenti. 

Aharubaju orundi, Puriida Kirya najunaanwa okuryangatanisa esente.

Nikigambwa ngu Ssali omu mwaka gw’eby’esente ogwa 2021/2022, omu kukoresa kubi obushoborozi bwe akatoorana Buyaka Growers Co-operative Society ekyabaire kitari aha rukarara rw’ebigombe ebyabaire nibiza kutunga esente za gavumenti ez’enshumbushano ahabw’okufeerwa ebintu byabo omu rutaro ahambaaririra y’enyongyeserereza ey’ebiro 04.08.2021.

Hoona nabwo, nikigambwa ngu Ssali omu mwaka gw’eby’esente ogwa 2021/2022 na 2022/2023, akashashura kampuni y’ebiragiro eya Kirya and Company Advocates esente zirikuhika shiringi 3,800,000,000 ezabaire ziri ez’ekigombe ekya Buyaka Growers Co-operative Society nikwo kuhenda ebiragiro bya minisiture eby’omwaka 2017.

Abahababi nibongyeraho ngu Ssali akaakora ekikorwa eki arikukimanya ngu nafeerereza gavumenti esente.

Ebihandiiko bya kooti nibyoreka ngu omurutaro rw’okuzaahuura eihanga omu mwaka gwa 1981 kuhisya 1986 orwabaire omu bicweka bitari bimwe by’eihanga, ebigombe by’abeteraine ebimwe bikateeganisibwamu oteireho n’okufeerwa ebintu byabo ekyabigyemesereize kushaba gavumenti okubashumbusha.

#WestUpdates