Omugyenzi Dr Jino Abiriga. COURTESY PHOTO

N’ebya Yosam Gucwaki, Masindi

Abantu bashatu abarikuteekateekwaho kuba baayejumbire omukwita Dr. Jino Abiriga, owaabeire ari omushaho wa disiturikiti ya Masindi baayongyezibwayo kuguma bari omukihome kya Gavumenti kuhisya ebiro 13.02.2024.

Abashatu aba barimu Betty Cherotich ow’emyaka 31, Martin Kipsanga ow’emyaka 42, na Joshua Namurenge ow’emyaka 36, baayongyera bayoherezibwa omukihome omuramuzi w’eidaara ry’okubanza owa Masindi, Selsa Biwaga kandi owaaba ari omubigyere by’ish’abaramuzi, Kosiya Kasibayo. 

Omushango gwaba guri okw’ogwanjurwa kwonka eki tikyabaasika ahabw’okuba omuramuzi w’okubahozesa, Kasibayo, ari omukahuumuro. Abashatu aba bateebwaho omushango gw’okwita ebiro 16.01.2024 ahakooti y’omuramuzi omuri Masindi.

Aliganyira Munanura Arinaitwe, omuhozesa wa Gavumenti yaamanyisa embuga z’amateeka ngu okucondooza kukiriyo nikugyenda omumaisho nikwo kushaba kwongyezayo omushango.

Abashatu nibagambwa kuba baitsire Abiriga ebiro 07.01.2024 omumaka gye omuri Kijura, diviijoni ya rwagati omuri Masindi.

Omubiri gwe gukashangwa gunagirwe omuburaingwa burikuhika mita 50 haihi n’amaka gye kandi gwashangwa gushazirwe ahamaraka, omumugongo hamwe n’ahaibondo.

Okucondooza okwahikireho:
 
Okucondooza okukozirwe aba poorisi ab’orubaju orurikucondooza barikukwatanisa na poorisi y’omukyanga ekyo hamwe n’ab’ekikoosi ekya Flying Squad bakashuukurura enaama eyamanyirwe mpora-mpora.
Okucondooza okwayeyongyeireho kukashanga ngu ekigyendererwa ky’okwita kikaba nikyeyegyekyerera ahanshonga z’omukishengye, eitima hamwe n’okwekyengyera obushambani.

“Kikashangwa ngu enaama y’okwita omugyenzi ekatandika bwanyima ya Cherotich Betty, kumanya obuzaare bw’omubonano obu iba yaabeire aine na Atuhura Susan omuri Masindi,” Fred Enanga omugambirizi wa poorisi nikwo yaamanyeise abanyamakuru omuri Kampala ebiro 15.01.2024.

Akongyera yaagira ngu, “Ekyarugiriiremu, akabanza yaacuma enaama y’okwita “muk’iba” kandi akaba ari ow’okutandikana n’okwosya enju ya nyamukazi, omuriro ogwaraziibwe bariraanwa.”

Ebiro 11.12.2023, Cherotic Betty akapangisa omwitsi Kipsanga Martin ahabwa shiringi 2,500,000 kwita Atuhura Susan. 

Bwanyima ya wiiki emwe, ebiro 18.12.2023, akooherereza Martin shiringi 500,000 kwija akaita Susan beitu hoona ekigyendererwa eki kikarema bwanyima y’owaabeire aine kwitwa kubura kwija ahamwanya ogu yaabeire nateekateekwa kwijaho,” Enanga nikwo yaagizire. 

Enanga akongyera yaagira ngu,”Ebiro 6.01.2024 ahari shaaha nka 6 z’eihangwe, Namureng na Kipsang bakakwata ekishengye kimwe aha Valentine’s Guest House. Omukiro nikwo kubagambira ngu omushaija we akaba abyami ari omuturo twingi.”

“Bakashanga omuryango ogurikuza omumaka gye gwigwire atyo yabatwara omukishengye. Bakaba baine enkoni 2 ezi barikuzaanisa omuzaano gwa Golf. Bakashanga nyakwitwa agwejegyeire baamuhonda ahamutwe n’omuhini, baakurura omubiri gwe baaguta ahansi nikwo kumucumita omumaraka,” enanga nikwo yaagizire.

Tukaza ahamyanya eyaakoreirwemu omushango, twayihaho ebintu ebyashangirweho obwe twine orikuteekateekwaho, emyenda y’abarikuteekateekwaho, ebi baabeire baine ah’izooba eri omugyenzi yaayiteirweho kandi ebimwe bikaheebwa abakugu abarikukyebera kumanya omuntu owaabeire aine ebintu ebyo ebyatungirwe kuruga omukicweka ekya Bulyasojo. Enshaho tukagiiha omu kamina ya Valentines Guest House. Ekaba eine akenda k’akashego, ekyenda ekirikusiimuura, endanga-muntu y’omurimo eya nyakwitwa hamwe n’endiijo myenda ya nyakwitwa eriho ebikaba by’eshagama,” Enanga nikwo yaagizire.

#WestUpdates