Omutindo mubi gw’amashomero gwerarikiriize aba Biharwe...(Photo by Edwin Ram)

N’ebya Edwin Ram

Mbarara:                                                         

Abeebembezi b’ekyanga kya Biharwe kuruga omuri Mbarara City North Division omururembo rwa Mbarara berarikiriire ahabw’omubaro gw’abeegi abarikuruga omumashomero kuguma nigweyongyera.

Omushomo ogutebeekanisibwe ekigombe ekirikugaita aba Biharwe ekya ‘BIDDEF’ bari kutaayaayira amashomero aga, kishangirwe ngu obutakwatanisa oburi omu bakuru b’amashomero n’abanyabukiiko hamwe n’abazaire nikyo kigagarwize enyima.

Barbara Nyamwiza, ori omukigombe ekya BIDDEF ahamushomo ogu..(Photo by Edwin Ram)

Rimwe ahamashomero agarikugambwaho harimu erya Nyabuhama Primary School erikushangwa Kakukuru, Biharwe eritushangire omumbeera mbi munonga ahabw’obutagira bibiina birikumara na zakamina.

Eishomero eri rikatandikwaho 1974, ahu riheerize emyaka 50 beitu wareeba ebiraasi ebi abeegi bari kushomeramu nahu barikuraara noreebera okutangaara. 

Aba baine abeegi 352 n’abashomesa 6 bonka eki mukuru w’eishomero, Twesigye Moses agiizire ngu kicumbagiize obuheereza.

Eishomero erya Nyabuhama Primary eribataayaayireho...(Photo by Edwin Ram)

Omushomo ogu gwetabirweho n’abeebembezi kumanya ebizibu ebiri kuteganisa eishomero eri beitu kishangirwe ngu abazaire n’abanyakakiiko na hedimasita baine emikyengano ekwatiraine n’eshonga z’esente ekiretsire ryagaruka enyima.

Kishangirwe ngu n’abazaire naabo tibakozire myooga yaabo, ahu baingi ahabeegi batuntuuzibwe, abandi tibarikushoma, ekirigirairemu bamwe kuruga ahaby’okushoma bakiri baato.

Aba BIDDEF bahaire abeegi ebikozeso bitari bimwe..(Photo by Edwin Ram)

Ahabw’enshonga ezi n’okwenda kuhwera kutunguura omutindo gw’eby’obwegyese, aba Biddef bashazireho kwirukangirira eishomero eri ahu bahaire abeegi ba P.7 ebikozesibwa  hamwe n’abaishiki kuruga ahakya 3-7 kuheebwa za pads.

Abaishiki barikutunga pads kubahwera baaba bari omu micwe...(Photo by Edwin Ram)

Aba bataayaayire n’agandi mashomero agarimu Kishaha hamwe na Rwebihuro P/S ahu baashabirwe kureeba ngu barinda eby’obuhangwa bw’ensi.

#WestUpdates
#RadioWestAt25