Omu kishushani ni eishomero erya Faith Secondary School eri omwegi oteirwe amasasi akafa abaire nashomeramu.

N’ebya Omushaki weitu

LIRA

Omwegi wa S.3 ow’eishomero erya Faith Secondary School omuri Lira ateirwe amasasi yaafa arikushooba kutaha omu eishomero bwanyima y’okuruga omu disco.

Nikigambwa ngu omwegi ogu na bataahi be bagurukire ekikaari ky’eishomero nikwo kuza omu disco haihi n’eitendekyero erya Uganda Technical College Lira eribaire niryakira abeegi abasya.

Amakuru nigoreka ngu obu abeegi babaire nibagaruka ah’eishomero shaaha nka 10:00 z’akasheeshe aha Sande ebiro 20.10.2024, hariho ekikoosi ky’eminyeto ekibaire nikitegyera abantu omu muhanda haihi na Uhuru bar aharuguuto orwa Lira-Soroti, akanya kakye kuruga ah’eishomero erya Faith Secondary School.

Sisto Odongo, 20, enzaarwa ya Alito omu disiturikiti ya Kole ateirwe amasasi omuntu otakamanyirwe yaafa.

Mukuru w’eishomero eryo, James Ocen agambire abanyabuzaare b’omugyenzi abarimu ishe ngu abeegi batorokire omu eishomero baaza omu disco. 

Naagira ngi ekikorwa ekibaireho n’eky’obusaasi kandi ayebuurize munonga eki omwegi ogu akozire ekigyemesereize omushaija obaire aine embundu kumuteera amasasi akamwita. 

Tugyerizeho kugamba n’omugambiirizi wa Pooriisi ahabwa North Kyoga, Patrick Jimmy Okema beitu abaire omu kihuumuro (official leave). 

Ahitugiire kuhandiikira amakuru aga, Omuduumizi wa Pooriisi ahabw’ekyanga ekyo, Stepehn Onencan abaire ataine kiyagambire aha nshonga egi.

Beitu hoona, omushaija orikuteekateekwaho kuba ateire omwegi ogu amasasi ashabire ngu habeho okucondooza kurikumara oteiremu n’okukoresa ebishushani bya CCTV kamera ebya haihi n’ebaara kumanya omwitsire.

“Ebirarugye omu kukyebera omutumbi nabyo nibyija kuhweraho kumanya yaaba omwegi ogu acumitsirwe, atemirwe nainga kuba ateirwe amasasi”, orikuteekateekwaho arikushoborora.

#WestUpdates