Omwijurirano gw’ebihome omu Uganda kwemeriire ahari 363.6%- Rupoota.

N’ebya Omushaki weitu

Rupoota y’oburinganiza, ebiragiro n’obuteeka eya Justice Law and Order ey’omwaka 2023/2024 neyoreka ngu omwijurirano gw’abasibe omu bihome omu Uganda kwemeriire aha bucweka 363.6 ahari 100.

Rupoota egi eshohoziibwe nyomwebazyo ebiro 19.11.2024 ahari Common Wealth Resort Hotel omuri Munyonyo neyoreka ngu abasibe abari omu bihome nibaingana 76,244 abarikuteezamu kashatu aha basibe 20,996 abaine kuba bari omu bihome ebyo.

Komishona w’obuheereza bw’ebihome omu Uganda, Andrew Byabashaija naagira ngu omubaro gw’abasibe nigubaasa kukyendeezibwa, ebihome byaheza kuhanguhibwa n’okutaho emiringo y’okutangira emishango kwongyerera aha miringo endaijo ey’okufubiramu abasibe abamwe nk’okubakoresa emirimo ya burungi-bwansi.

Byabashaija naagira ngu abasibe okuba baingi omu bihome nikureetera eby’obuyonjo bitabonera, okubura kutunga obuheereza burungi bw’eby’amagara, eby’okurya, abakozi kuba bakye n’okubura entambura y’okubatwara abasibe omu kooti.

#WestUpdates