Kenneth Akanduhura Mugooha ari omukooti ebiro 16.09.2024. PHOTO: Bruno Mugizi

N’ebya Bruno Mugizi

Owaayesimbireho kujwekyera Munisiparite ya Ishaka – Bushenyi omu ishengyero, Kenneth Akanduhuura Mugooha, ateire ekiruhuuko bwanyima y’okutunga okwemererwa omu kooti

Ogu ari ahamishango y’okuhamba, okutweka n’okwihisamu enda y’omukozi we owaabeire aine emyaka 15

Akanduhuura ow’emyaka 35, aharwokubanza ebiro 16.09.2024, areebekireho omumaisho g’omuramuzi, Amos Kwizera, owa kooti enkuru omuri Bushenyi, ahamishango eyamurugiriireho okukwatwa abaserukare abarikucondooza ahamishango ebiro 17.04.2024, barikuragiirwa Minisita w’enshonga z’eminyeto n’abaana, Balaam Barugahara.

Okuragiira okukwatwa kwe kukaijaho bwanyima Minisita Barugahara kureeba emboozi y’obusaasi aha TV West, omu abanyabuzaare ba kitabaarizibwa barikutura Akanduhura okuhamba omwishiki waabo omuri Kyeitembe, Ishaka-Bushenyi hamwe n’okuhwera kwihamu end ana bwanyima akamunagaho.

Nikigambwa ngu omukwezi kwakabiri omwaka ogu, obu yaabeire ari omuri Kyeitembe, Ishaka-Bushenyi Akanduhura akaigura orwigi rw’omukozi w’omuka, kifuba, nikwo kubyama nawe kandi akamutiinisiriza obutagamba ekyabeireho.

Beitu hoona, omunyabutegyeki ogu ayehakaine emishango.

Omuramuzi Kwizera aragiire okurekura Akanduhuura ahamutango gwa sente zirikwingana shiringi miriyooni 10 eza buriho ahabw’amagara mabi agu arikugambwa kuba arimu kandi abamwemerereire n’ab’okutaho shiringi miriyooni 15 ezitari z’oburiho.

Ayongyeire yaamuragiira kuguma naija omu kooti bwanyima ya wiiki 2.

#WestUpdates