Disiturikiti ya Isingiro eyigwireho orutindo rwa Kushuro oruheerize kwombekwa omu disiturikiti egi. Photos by Abdulkarim Ssengendo.

N’ebya Abdulkarim Ssengendo

ISINGIRO

Disiturikiti ya Isingiro eyigwireho orutindo rwa Kishuro oruheerize kwombekwa omu disiturikiti egi.

Orutindo oru orumazireho shiringi 1,903,497,380 rukozirwe aba Development Response to Displacement Impact Project (DRDIP) ahansi y’enteebekanisa eya Social and Economic Services and Infrastructure component. 

Orutindo oru rwigwirweho omu butongore minisita w’eihanga ow’eby’amatungo, Lt. Col. Bright Rwamirama.

Rwamirama naagira ngu orutindo oru nirwija kuhwera abantu b’omu disiturikiti okutwara emishuuburo yaabo omu katare. Oru rugiire omu mwanya gw’orutindo orwatwairwe omwegyemure omu mwaka gwa 2013 ekyasigire abatuura ba Nyamuyanja na Kabuyanda bashobangiriirwe.

Orutindo oru rwigwirweho omu butongore minisita w’eihanga ow’eby’amatungo, Lt. Col. Bright Rwamirama.

Abatuura nibagira ngu obutagira ah’okuraba kibateganiise omukuza kutunga obuheereza omu marwariro, amashomero n’entaasya y’omu maka gaabo.

Okurugiirira aha batuura, omubaro gw’abeegi abarikuruga omu mashomero gukeyongyera ahabw’okutambura engyendo naingwa kuza kwambuka emigyera ekintu ekibaire nikita amagara gaabo omu kabi.

Umar Mulindwa, kirinju w’omu kicweka eki nakyoreka ngu okufa kw’orutindo kukateganisa munonga okutambuza emishuuburo nk’ebitookye, amatungo n’endiijo kugitwara omu katare.

Omu bigambo bye, Minisita Rwamirama asiimire gavumenti ahabw’okurugayo ekabombekyera orutindo kurabura omu purogyekiti eya DRDIP arikugira ngu orutindo oru n’orwamaani, niruhango kandi nirwija kuhangaara.

Rwamirama agizire ngu orutindo n’akamanyiso akarikworeka ngu gavumenti neefayo kutunguura emituurire y’abantu b’omu disiturikiti ya Isingiro.

“Orutindo n’obujurizi aha kworekwa kwa gavumenti okw’okuhindura Uganda ekaba ‘Middle Income Status’ omwaka gwa 2040 gwaza kuhika,” Aaron Turahi- ceeyamaani wa disiturikiti ya Isingiro arikushoborora.

#WestUpdates