Owabaireho Minisita Musumba kukomwa ameezi 6 ahabw’eibanja rya Sh160m.

N’ebya Omushaki weitu

Owabaireho minisita w’eihanga ow’eby’amataka, Isaac Isanga Musumba asiindikirwe omu kihome kumarayo ameezi 6 ahabw’okuremwa kushashura eibanja rya shiringi 160,000,000.

Aharwakashatu ebiro 23.10.2024, Musumba akwatsirwe yatwarwa omu kooti y’eby’obushuubuzi omuri Kampala ahabw’okuremwa kushashura omushuubuzi Charles Wakwale.

Ebihandiiko bya kooti nibyoreka ngu ahabiro 14.08.2023, Musumba akeeguza esente ahamushuubuzi Charles Wakwale kandi bakakora endagaano y’okushashura esente ezo omu biro 4 byonka ebyabaire nibihwayo ebiro 18.08.2023.

Wakwale agambire kooti ngu za Cheque zoona ezi Musumba yamuhaire kushashura eibanja eryo zika “bouncing”.

Omuramuzi Patience Tumusiime Rubagumya asiindikire Musumba omukihome kumarayo ameezi 6 ahabw’okuremwa kuheereza enshonga erimu eigufa emureteire yaremwa kushashura eibanja rya shiringi 160,000,000.

#WestUpdates