PHOTO: Courtesy

Poorisi omu disiturikiti ya Kazo eriyo necondooza ahakicumuro ky’okwita omushaija orikumanywa nka Kahembera Misach, 57, omutuura w’ekyaro kya Meru Meru omumuruka gwa Kataraza omugomborora ya Nkungu omu disiturikiti ya Kazo ekibeireho ebiro 05.02.2025 ahari shaaha nka 12 z’akasheeshe.

Okurugiirira ahamugambirizi wa Poorisi y’ekyanga ekya Rwizi, SP Samson Kasasira, omugyenzi akataahirirwa abatabani 2, Mugabe Naboth, orikukira kumanywa nka Yanga na Nuwabiine Amos n’ondiijo muntu otakamanyirwe, obu yaabeire ari omuka owe.

Abashatu aba bakataahirira amaka gye, bakwaitse emihoro n’enyondo, bataaha omunju ye baamutemagura nikwo kumureetera yaajwa munonga ekirugiriireho okufa kwe.

Na bwanyima abantu aba bakairuka baaza kweshereka.

Omwe orikuteekateekwaho kukora obwinazi obu, Kyarikunda Olivia, akwatsirwe kuhweraho poorisi omukucondooza.

Okurugiirira ahakucondooza okwakozirweho, kishangirwe ngu omugyenzi atwaire omumihondano n’ab’eka ye eyarugiriire ajakushwera omukazi wa kabiri kandi hoona nabwo orikuteekateekwa kuba yaitsirwe omukazi n’abandi batabani, beitu hoona abari omukihome obwa hati.

Okucondooza nikugumizamu omumaisho
#WestUpdates