Jonathan Nzogi, 31, ogambiire kooti ngu abaire najwara unifoomu y'amahe ga UPDF kushendashenda abantu kwija omu kanisa ye n’ahanteerane. PHOTOs: Douglas Mubiru.

N’ebya Douglas Mubiru

MAKINDYE

Kooti y’ekinyamahe omuri Makindye, Kampala ecweriire omushaija orikweyeta Paasita ow’ekanisa ya Cross of Miracle Church Kanyanya omur Kampala kukomwa emyaka 3 bwanyima y’okumusingisa omushango gw’okushangwa na unifoomu y’amahe ga UPDF omubuhenda biragiro.

Jonathan Nzogi, 31, ogambiire kooti ngu abaire najwara unifoomu y'amahe ga UPDF kushendashenda abantu kwija omu kanisa ye n’ahanteerane. 

Kooti ebaire ekuriirwe Brig. Gen Robert Freeman Mugabe niyo ecweriire Nzogi ekifubiro eki nyomwebazyo ebiro 15.07.2024.

Nzogi aikiriize kuba yakozire omushango ogu nikwo Omuramuzi kumucwera okukomwa emyaka 3 omu kihome.

Gen. Mugabe ahabwire Nzogi okujuriza omu bwire bw’ebiro 14 yaaba atamazirwe n’encwamu ya kooti ye ey’ekinyamahe omuri Makindye.

Purida wa kitabarizibwa Capt. Simon Nsubuga Busgwa, ashabire kooti kuheereza Nzogi ekifubiro kiringaniire arikugira ngu aikiriize omushango ogu, tasisire bwire bwa kooti, n’omushaija muto kandi ayeteekateekire kwegarukamu.

Abahababi beebembiirwe Col. Raphael Mugisha na Capt. Alex Mukhwana bagambiire kooti ngu ahabiro 13.07.2024 shaaha nka 10 z’omwabazyo aha mwanya gwa Buloba checkpoint aharuguuto orwa Kampala-Mityana omu disiturikiti eya Wakiso, Nzogi ashangirwe ajwire unifoomu z’amahe omu buhenda biragiro.

#WestUpdates
#RadioWestAt25