Mulinde naagambwa kuba yashukirwe acid abainazi abataramanyirwe ahabiro 24.12.2011. Courtesy Photo.

N’ebya Samuel Lutwama na Umaru Kashaka           

Paasita w’omu rurembo, Umar Mulinde, ou bashukire acid aha maisho omu kwezi kwa 12, 2011 ari kubi, okurugiirira aha ba famire ye. 

Mulinde naagambwa kuba yashukirwe acid abainazi abataramanyirwe.

Joweria Namugga, nyina wa Mulinde agambiire Radio West ngu omutabani atwire nayikiza omu kapiira ah’eirwariro Sheba Medical Centre omuri Tel Aviv, Israel, kumara ebiro kumuhweraho kwisya gye.

“Mutabani wangye atwire aine obuzibu omu kwisya kuruga ashukwa acid kandi eki kitwire nikimuteganisa omu kubyama kwe. N’obu ayihirwe aha kapiira k’okwikizamu, embeera ye ekiri kubi, Namugga arikushobororera abanyamakuru ba Radio West Orwakana ebiro 08.08.2024.

Mulinde nabwo ni Paasita mukuru aha kanisa ya Gospel Life Church International aharuguuto omuri Kampala.

Omuhwezi we aha kanisa, Paasita John Famba, atwire nagambaho n’abashaho kandi abo abariyo nibamuragurira omuri Tel Aviv, Isreal nibashoborora ngu Mulinde amazire ebiro arikwikiza omu kapiira ah’eirwariro erya Sheba Hospital.

 “Hahwireho emyaka 12 kuruga atunga okuragurirwa omuri Isreal ahabw’amasya agu yatungire beitu okwezi okuhwaire, atandikire kutunga obuzibu omu kwisya obwo ari omu Uganda nikwo kumanyisa abashaho be ab’omuri Isreal,” Famba arikushoborora. 

Famba naagira ngu omushaho amuhabwire kuguma naza Isreal kumushwijuma kureeba ahu yahika.

Ahabiro 24.12.2011, omuntu otaramanyirwe akashuka Mulinde acid aha maisho nikwo kumuhutariza kimwe erisho rye rya buryo n’aha maisho.

#WestUpdates